23-январь куню «Йылдыз» меджмуасынынъ идареханесинде меджмуа коллективине ве эйетине «Йылдыз» меджмуасынынъ янъы баш муарририни такъдим этюв мерасими олды.
Бу тедбирде Миллетлерара мунасебетлер ве сюргюнликке огъратылгъан ватандашларнынъ ишлери боюнджа Джумхуриет Комитетининъ реиси Сервер Салиев, Миллий Меджлис реисининъ муавини Ремзи Ильясов, Къырымтатар языджылар кенъешининъ реиси Риза Фазыл чыкъышта булундылар. Баш муаррир шаир, журналист, терджиман Дилявер Осман олды.
Бу акъта Риза Фазыл бойле деди:
-Шакир Селимнинъ вефат эткенине эки ай кечти, ребер ёкъ. Меджмуа хадимлери кереги киби чалышып оламайлар. Шу себептен ребер ишини тезлештирдик. Бу меселеде Мустафа Джемильге мураджаат этильди. Ремзи Ильясовгъа, Сервер Салиевге айтылды. Олар хадимлер топлашув япып, ким ляйыкъ олгъаныны озьлери косьтерсинлер, чюнки олар чалышаджакълар, деди. Меннен де кенъештилер. Мен де оларнынъ теклифине разы олдым, чюнки меджмуа эдебий журнал, баш муаррир языджы олмакъ керек.
Языджыларымызнынъ эксериети 70-ни кечкен адамлар. Рескомнац реиси 70 яшындан кечкен инсанлар девлет идаресине ишке къоюлмай деди. Ондан башкъа яшча языджылар бизде Айше Кокиева, Наджие Аметова, Исмаил Керим, Сейран Сулейман, Дилявер Осман - беш адам. Кене къарт адамларны къояджакъмызмы, я да яшларны осьтюрмек керекми? - деген суаль догъды ве Дилявер Османнынъ намзетине келип токъталдыкъ.
Озю де баягъы яштаки адам, теджрибеси бар, чокъ ерлерде ишлеген, къалеми бар, шаирлиги бар, тешкилятчы адам. Меджмуагъа бойле тазе кучь керек, деген фикирге кельдик.
Меджлис реберлиги хадимлер топлашып, музакере этсин деди. Бойлеликнен, коллективнинъ теклифинен, Миллий Меджлиснинъ разылыгъынен, Миллетлерара мунасебетлер боюнджа Джумхуриет Комитети баш муаррир оларакъ Дилявер Османны тайин этти. Чюнки «Йылдыз» Комитетининъ ме-джмуасыдыр.
Дилявер Осман 1959 сенеси Ташкент виляетининъ Бекабад шеэринде догъды. Къазан консерваториясыны битирди. КъМП университетинде дерс бермекте. 1993 сенесинден Татаристан языджылар бирлигининъ азасы, 2008 сенесинден Украина языджылар миллий бирлигининъ эм де Украина театр эрбаплары бирлигининъ азасы. Онынъ эсерлери Украина, Тюркие, Татаристан, Романиядаки девирий матбуатларда ве муэллифликтеки джыйынтыкъларда дердж олунды.
Дилявер Осман 1989 сенеси Къырымгъа къайтты ве Къарасувбазар шеэрине ерлешти. Анда район газетинде «Къарасув» саифесини тешкилятландырды. Къырымтатар медениетини гъайрыдан тиклев координацион меркезине реберлик япты. Онынъ тешеббюсинен 1993 сенеси Къарасувбазардаки Комсомольская сокъагъына Бекир Чобан-заде ады берильди.
Миллий Меджлисте матбуат кятиби вазифесинде чалышты. Айны заманда « Азатлыкъ» («Свобода») радиосынынъ Къырымдаки мухбиридир. Татаристанда хызмет косьтерген медениет эрбабы.
Наджие АМЕТОВА.
Фикирлер
“«Йылдыз» меджмуасына баш муаррир тайин этильди” макъалесинде бир дане джевап бар.
Фикирлеринизи языныз
Rahmetli sairimiz Sakir Selim’in yerine Yildiz jurnali’nin bas muarriri saylangan sair Dilaver Osman’ni yurekten xayirlay yani vazifesinde buyukten buyuk muvaffakiyetler tileyim. Onun idaresinde Yildiz Jurnali uzun omurlu olmasini ve her Qirimtatar evinde okunmasini temenni etem!
Saygilarimnen,
Mubeyyin Batu Altan
Crimean Tatar Research and Information Center
N. Bethesda, MD/AQS