Эали ичюн байрам
28 Мар 2009 | Миллий медениет
Керич шеэринде яшагъан эали, чокъ языкълар олсун ки, ёл узакълыгъы себебинден меркезий шеэр - Акъмесджитте отькерильген концерт, серги ве дигер медений тедбирлерге, бунынънен берабер Миллий академик музыкалы-драма театримизге барып оламайлар. Шу себептен медениет хадимлерининъ бизим шеэрге япкъан гастроллери эали ичюн буюк байрамгъа чевириле.
Наврез арфесинде шеэримизнинъ медениет меркезинде Тюрк медениет меркези ве Эскендер Къуртмеметов, Айяр Джаппаров, Рефат Номановнынъ реберлигинде бирлешкен къырымтатар джемаат тешкилятлары ве шеэр эм кой спонсорлары тарафындан бойле бир байрам тешкилятландырылды. Къырымтатар академик музыкалы-драма театри «Хырсызлангъан келин» спектаклини нумайыш этти.
Бу спектакльде театр артистлери къарасувбазарлылар омюринде олып кечкен вакъианы миллий колорит ве терен сёз байлыгъы иле айдынлаттылар. Спектакльде театримизнинъ белли артистлери Дилявер Сеттаров, Алие Темиркъаяева, Фатма Асанова, Мустафа Къуртмоллаев, Энвер Билялов, Дилявер Аджимамбетов, Расим Юнусов ве дигерлери иштираек эттилер.
Сейирджилер спектакльнинъ эр бир пердесини гурьдели эльчырпмаларнен алгъышладылар. Театр артистлери озь эмеклеринен эалини миллий медениетимизге, санатымызгъа, тилимизге якъынлаштырдылар ве сейирджилерде силинмез теэссурат къалдырдылар.
Наджие БАТАЛОВА.
Фикирлер
Фикирлеринизи языныз