Яхшылыкъ яманлыкъны енъер
28 Мар 2009 | Ислям Нуру
Яхшылыкъ яманлыкъны
енъер
деген Мухаммед (с.а.в.) пейгъамберимизге севгимиз ич бир вакъыт сёнмейджек
Бисмилляхир-рахманир-рахим
Пейгъамберимизни севемиз,
Аллагъа шукюр этемиз
Бизге оны багъышлады
Къальбимизде къалдырды.
Мен Алла Таалягъа омрюм боюнджа шукюр этеджем. Чюнки Алла бизге мерхаметли, къадыр, керим пейгъамберимиз (с.а.в.) акъкъында огренмеге фурсат берди.
Мухаммед пейгъамберимиз (с.а.в.) 571 сенеси Арабистаннынъ Мекке шеэринде догъды, яшады. Бу сене пейгъамберимизнинъ догъгъан куню март 8-ден 9-гъа (Реббиуль эвель 10-дан 11-ге) кечер геджесине расткельди. Пейгъамберимиз еди къат кокнинъ эр бир къатында булунды ве анда ондан эвель яшагъан пей-гъамберлернен сёйлешти. Мухаммед Алланынъ яраткъан, кешф эткен энъ аджайип шейлерини корьген ве Онынънен къонуш-къан. О намуслы, адалетли олгъаны ичюн оны эр кес севе ве урьмет эте эди.
Инсанлар онъа ишанып сырларыны биле айткъанлар. О кучюк бала олгъанда, онынъ этрафында адамлар: “Алла оны айрыджа яраткъаныны сезмемек мумкюн дегиль”, деп тюшюне эдилер.
Мухаммед (с.а.в.) эр кесни севиндире, эр кеске бахт кетире эди. Иште, бу улу инсан биз кутькен ислям динимизнинъ Пейгъамберидир.. Мерхаметли Алланынъ саесинде биз мусульманлармыз. Ислямнынъ пейгъамбери Мухаммед (с.а.в.) бу дюньядаки энъ севимли, энъ мерхаметли Алланынъ къулудыр.
Бир заманда гуя коктен энген дёрт китап бар экен. Биринджиси - Зебур, экинджиси Инджиль, учюнджиси Теврат ве сонъки мукъаддес Къуран-и Керим. Бу китап сонъки олгъаны ичюн энъ догърудыр. Къуран-и Керимнинъ аетлери пейгъамберимиз Мухаммед (с.а.в.)ге эндирильген эди.
Къуран пейгъамберимизге эндирильгени акъкъында икяе бар. Мухаммед (с.а.в.) буюк олып энди эвленген сонъ, о тюшюнде корьгенлерини аятта догъру олып чыкъкъаныны сезе. Ойле вакъыт кельди ки, Рамазан айында Алла онъа Къуран-и Керимнинъ бирин-джи аетлерини эндире башлады. О вакъытта Мухаммед (с.а.в.) 40 яшында эди.
Куньлернинъ биринде о эр вакъыттаки киби бир къобагъа отурмагъа кетти. Онда тюшюнип отургъанда, онынъ огюнде Джебраиль мелек пейда олды ве Къуран-и Керимнинъ биринджи аетлерини кетирип, Мухаммед(с.а.в.)ге окъумасыны эмир этти.
Мухаммед (с.а.в.) исе окъумагъа бильмегенини айтты. Джебраиль оны къучакълап ойле бир сыкъты ки, Мухаммед (с.а.в.) бунынъ агърысына зорнен даянды. Джебраиль онъа кене окъумагъа эмир этти, амма Мухаммед окъуп оламады. Джебраиль оны эки кере зияде сыкъты ве бойле деди:
- Сени Яраткъан Раббининъ адынен окъу! Окъу!
Бундан сонъ Мухаммед (с.а.в.) Раббининъ адынен окъумагъа башлады.
Бу вакъиадан сонъ Джебраиль кене де Мухаммед(с.а.в)нинъ огюнде пейда олып, о, Мухаммед пейгъамбер (с.а.в.) олгъаныны ве бу куньден башлап эр кесни Аллагъа табынмагъа чагъырмагъа борджлу олгъаныны анълатты. Шу куньден башлап Мухаммед Пейгъамберимиз (с.а.в.) озюнинъ якъын адамларына инсаннынъ яраткъан ве онъа яшамакъ ичюн бутюн шейлерни берген Алла - бу бизим Раббимиз олгъаныны анълатмагъа башлады.
Биз, ислям динини кутькен инсанлар, Алладан энген Къуран-и Керимни урьмет этип, онъа ишанып, аятымызнынъ ана-иза китабы, деп саямыз. Мусульманлар оларакъ, Къураннынъ аетлерини, сурелерини бутюн къальбимизнен окъуймыз ве инанамыз.
Пейгъамберимиз озь вакътында иман не олгъаныны косьтермеге башлагъан. Мен ве этрафымдаки бутюн якъын инсанларым Пейгъамберимизге инанамыз.
Пейгъамберимиз эр вакъыт инсанларгъа яхшылыкъ яманлыкъны енъер, деп айта эди. Чюнки яманлыкъ бир чамур киби, бир кере кирлендинъми, оны ювмадан чыкъмазсынъ.
Эгер темизленсенъ, япкъан хаталарынъны тюзетсенъ, о чамур кете. Шейтан кене акъылынъа кельмедикче чамургъа былашмазсынъ.
Бунынъ ичюн биз Пейгъамберимизни севемиз. О ислям динини теблигъ эткен. Инсанлар ислямгъа къаршылыкъ косьтергенлер, нетиджеде, пейгъамберимиз Мекке шеэрине иджрет эткен. Сонъра инсанлар хата япкъанларыны анълагъанлар.
Франсыз океанологы Жак Ив Кусто ольмезден секиз йыл эвель ислям дини не къадар темиз, намуслы олгъаныны исбат этти. Кет-кете ислям динине къошулгъан инсанларнынъ сайысы чокълаша.
Пейгъамберимиз: “Эгер сизге яманлыкъ этселер, яхшылыкънен джевап бери-нъиз”,- деп огют берген. Меселя, бир заманларда шейтанлар дженнетнинъ мелеклерине таш ата экенлер, оларнынъ узеринден куле эдилер.
Мелеклер исе оларнынъ яманлыкъларына яхшылыкъ къайтаргъанлар: дженнетнинъ энъ дюльбер алмаларыны ат-къанлар. Шейтанларнынъ аткъан ташлары исе гульге чевирильген, дженнетнинъ энъ дюльбер ерлерине къонгъан. Шейтанлар бунъа опькеленип кеткенлер.
Иште, пейгъамберимиз инсанларгъа бойле мисаллер кетирип, динимизни анълаткъан. Бизим онъа севгимиз ич бир вакъыт сёнмейджек.
Онъа косьтерген урьметимиз бир ышыкъ олып юрегимизни айдынлата-джакъ, биз ондан орьнек алып омузларымызда отургъан эки мелек Керамин ве Кятибиннинъ эллериндеки олгъан дефтерлерини яхшылыкъ мисаллеринен толдурмагъа тырышаджакъмыз. Пейгъамберимизни омрюмиз бою унутмайджакъмыз.
Гульсум ХАЛИЛОВА,
Къарасувбазар районы
Орталан (Земляничное) кою.
Фикирлер
Фикирлеринизи языныз