Амди агъа Мустафа
намуслы, муляйим, ватанпервер инсан эди
Джумаакъшамы куню, 25-мартта, миллий муэссиселеримиз арасында кедерли хабер даркъатылды: Амди агъа Мустафа бу фаний дюньяны терк этти. Онынъ адыны эшиткен ватандашларымызнынъ базылары: я о ким эди? - деген суальни бере башладылар.
Бунъа тааджипленмеге сыра тюшмей, чюнки Амди агъа пек алчакъгонъюлли, атта юваш адам эди. Ондан да гъайры, 91 яшкъа кельген ихтиярны яхшы бильген достлары, теэссюф ки, сагъ дегиллер. О озь несилининъ, озь миллетининъ аджджы такъдирини белли дереджеде текрарлап, бунынънен берабер озьгюн омюр ёлу кечти. Эм де бу ёл агъыр сынавлы, энишли-ёкъушлы олып, Амди агъанынъ юрегини чокъ ипрандырды.
А. Мустафаев шимди Багъчасарай районына бакъкъан Янъы-Сала (Новополье) коюнде 1918 сенеси догъды. Рессамлыкъ истидаты олгъан генч мектептен сонъ Акъмесджиттеки бедиий окъув юртуна (шимди о Самокиш адыны ташый) кире, тасиль ала. Сонъра оны ордугъа чагъыралар. Дженк башлай. Башындан сонъунадже джебелерден кечкен субай А. Мустафаев ордудан тек 1954 с. къайтта, эвлене.
Ташкентте яшай. 1968 сенеси андаки мескенини Акъмесджиттеки квартирагъа денъиштире. Бунъа вастаджы олгъанлар озь «хаталарыны» тюзетмеге тырыштылар, амма Амди агъа озюни ве къорантасыны къорчаламагъа бильди. Къоркъузмакълар (эки башлангъыч мектеп чагъындаки баласы бар эди), такъиплер, къаба адалетсизлик, ишке алмамакъ, акъаретлер нетиджесиз къалмады: шу йылы о инфаркткъа огърады. Халкъымызнынъ Ватанына кутьлевий авдетинден эвель Къырымда 20 йыл, я да олсун 10 йыл яшагъан инсанлар о девирнинъ «къыйметини» пек яхшы билелер.
1980 сенелерининъ сонъундан башлап, А. Мустафаев бир къач сафдаш-достунен берабер умметимизге Кебир джамини къайтармакъ, диний идаремизни тиклемек пешине тюшелер ве макъсатларына иришелер.
Дженкявер субай, истифадаки полковник Амди агъа миллетчи, акъикъий ватанпервер инсан эди. Онынъ бу чизгиси рессамлыкъ иджадында да озь аксини тапты. О Ватан манзараларынен бир сырада I Къурултай ёлбашчыларынынъ портретлерини сызды, сергилерде, чешит сиясий тедбирлерде фааль иштирак этти. Оны бильгенлернинъ хатырасында Амди агъа намуслы, сабырлы, муляйим, бильгили, миллетини севген инсан оларакъ къаладжакъ.
Алла рахмет эйлесин.
Достлары, сафдашлары, Къырымтатар дженк ве эмек ветеранлары тешкиляты, Къырымтатар рессамлары бирлиги, «Къырым»
муарриети.
Фикирлер
“Амди агъа Мустафа намуслы, муляйим, ватанпервер инсан эди” макъалесинде бир дане джевап бар.
Фикирлеринизи языныз
Алла рахмет эйлесин.