Ана тилимиз халкъымызнынъ рухий байлыгъыдыр. Онынъ инкишафы миллет оларакъ сакъланып къалмакъ меселесинде эсас ер тута. Шу себептен ана тили проблеми дигер муим меселелернен бир сырада тура.

Март 31 куню Къырымтатар академик миллий-драма театримизде «Тувгъан тилим! Ана тилим! Кене яша!» адлы эдебий-бедиий театрлештирильген программа олып кечти. Бу программаны Миллий Меджлиснинъ къолтутувынен «Къардашлыкъ» джемаат тешкиляты, «Маарифчи» бирлешмесининъ яшлар болюги, Къырымтатар академик музыкалы-драма театри тешкилятландырды.

Программада «Къардашлыкъ» тешкиляты азалары, Миллий театримиз, «Джемиле» балалар ансамбли, «Къырым генчлери» ансамбли, Акъмесджит шеэр 42 санлы мектепнинъ 2-нджи сыныф талебелери иштирак эттилер.

Эдебий-бедиий программада классик ве земаневий шаирлеримизнинъ тильнен багълы шиирлери окъулды, «Къырым генчлери» ансамбли озь оюнларынен сейирджилерни къувандырдылар. «Джемиле» ансамбли «Къалайлы къазан», «Салачыкъ» ве дигер оюнларны нумайыш этти.

42 санлы мектеп талебелери тиль акъкъында шиирлер окъумакънен бир сырада театрнинъ яш артисти Нияра Меджитованен берабер Мемет Нузетнинъ «Ана иле бала арасында» шиирини саналаштырып окъудылар. Сонъра миллий урба кийген къызчыкълар эллерине къокълачыкълар тутып, «Айненни» йырладылар.

«Къардашлыкъ» азалары ве театр артистлери бераберликте тилимизнинъ бугуньки вазиети ве келеджегине аит левхаларны нумайыш эттилер. Тилимизни яхшы бильген яш йигит тилимизге эджнебий сёзлерни къарыштырып лаф эткен достларына догъру япмагъаныны анълатмакъ макъсадынен къарыштырылгъан эр бир эджнебий сёз ичюн къуту ичине бир капик ташламагъа талап эте. Бу инсан юзюнде тебессюм пейда олмагъа себепчи левха нуткъумызгъа дикъкъат этмеге чагъыра.

Экинджи левхада арадан 65 йыл кече ве бу эки генч энди къарт ола. Олар санки телеяйин бакъалар. Санада бугуньки кунюмиз ве умют бериджи келеджегимиз акъкъында къыскъадан видеофильм косьтериле. Буны бакъып, яшлыкъта ана тилимизге дикъкъат этип, нутукъларыны эджнебий сёзлерден темизлегенлерине къуваналар.

Бу тедбирде ана тилимизни унутсакъ, огърайджакъ фааджиамыз акъкъында да левхалар ярдымынен сёз юрсетиле.

Тешкилятчылар эдебий-бедиий театрлештирильген программада бойле левхаларны нумайыш этер экенлер, бизим келеджегимиз бугуньки куньде озюмизни насыл алып барсакъ, онен сыкъы багълы олгъаныны косьтермеге тырышалар, яни эгер биз бугуньден башлап, миллетимизни сакълап къалувда эсас фактор олгъан ана тилимизде лаф этсек, Къырым бизимки олур, барып да унутсакъ, эджнебий тиль устюнлик япса, биз Иван агъа Мамбетовларгъа чевирилирмиз.

Программанынъ сонъунда «Маарифчи» бирлешмеси миллий тасиль кенъешининъ ёлбашчысы КъМПУ уйкен оджасы, бир сыра лугъатларнынъ муэллифи Сейран Усеин, V Миллий Къурултай тефтиш комиссиясынынъ реиси Къуртеген Асан, Миллий Меджлис медениет ве тасиль идаресининъ реиси Сафуре Каджамет, Миллий театримизнинъ иш юрютиджиси Решат Ахтемов ве дигерлери чыкъышта булундылар. Олар тилимиз, девлетчилигимиз акъкъында чокъ насиатлы, гузель сёзлер айттылар, истеклер бильдирдилер.

Бу аджайип «Тувгъан тилим! Ана тилим! Кене яша!» программанынъ муэллифлери «Маарифчи» бирлешмеси яшлар болюгининъ ребери Эльвира Бориева ве «Къардашлыакъ» яшлар тешкилятынынъ реиси Заур Халкечтир. Саналаштырмагъа ве ойнамагъа Къырымтатар академик музыкалы-драма театри ярдым этти. Булар режиссёр Рефат Сеит-Аблаев, артистлер Энвер Билялов, Зейнеп Ягъяева, Эльдар Джелилов, Эскендер Ислямов, Нияра Меджитовадыр.

Миллий театрнинъ бедиий ребери Украинада нам къазангъан санат эрбабы Билял Билялов, лейиханынъ ребери Миллий Меджлис медениет ве тасиль идаресининъ реиси Сафуре Каджамет.

Программанынъ сонъунда тешкилятчыларгъа ве иджраджыларгъа «Маарифчи» тешкиляты тарафындан гуллер такъдим этильди.