Байрам мерасими
12 Мар 2008 | Миллий медениет
Халкъымызнынъ энъ назик ве джесюр векиллери…
7-мартта миллий театр бинасында Миллий Меджлис, Къадын-къызлар бирлешмеси, Къырымтатар медениет вакъуфы гузель къырым къадынлары ичюн тантаналы байрам концертини тешкилятландырдылар.
Назик къадынларымызгъа байрам кунюнде энъ буюк эдие - бу дикъкъаттыр, чечеклер ве бир-къач сыджакъ сёз. Бу эписи юкъарыда анъылгъан байрам тедбиринде олды.
Къырым къадын-къызлар бирлешмесининъ башы Сафинар ханым Джемилева гузель семетдешлеримизни бу баарь байрамынен хайырлап, шу джумледен къырым къадын-къызлары халкъ ичюн агъыр куньлерде энъ кучьлю хусусиетлерини корьсетти ве халкънынъ гъайып олмамасына озь иссесини къошты, деп къайд этти.
Айны бу къадын-къызлар сюргюнликнинъ энъ агъыр куньлеринде озь балачыкъларына озь омюрини къурбан эттилер. Айны шу къадынларымыз бугунь де эм аиле бакъмагъа, эм балаларны осьтюрмеге, эм земаневий къадын олмагъа тырышалар.
Миллий Меджлис реисининъ муавини Ремзи Ильясов къырым къызлары бутюн дюньяда энъ аджайип, гузель, джесаретли ве сабырлылар, деп айтты. Бу байрам кунюнде о къадынларгъа бутюн халкъ адындан миннетдарлыкъ бильдирди ве келеджекте бутюн истеклери керчеклешиесини тиледи.
Миллий Меджлис азалары Сафуре ханым Каджаметова ве Ресуде ханым Измайлова миллий арекетнинъ фааль иштиракчилерине, энди нефакъа чагъында олгъан бизим федакяр гузель къадынларымызгъа Миллий Меджлис адындан пара мукяфатларыны багъышладылар ве оларгъа халкъ адындан буюк миннетдарлыкъ бильдирдилер, къавий сагълыкъ ве узун омюр тиледилер.
Бундан гъайры яшайышнынъ чешит сааларында чалышкъан ве озь зенаатында мутехассыслыгъыны, буюк усталыгъыны косьтерген ве къырым халкъы аятында фааль иштирак эткен аджайип къадын-семетдешлеримизге Миллий Меджлис адындан фахрий ярлыкълар, чечеклер ве хатыра бахшышлары багъышладылар.
Бунынънен берабер Къадын-къызлар бирлиги ерли болюклерининъ фааль иштиракчилерини де айры хайырладылар ве оларнынъ джемаатчылыкъ фаалиетининъ буюк ролюни де къайд эттилер.
Бу куню миллий театрнинъ залы толу эди. Мында тек Акъмесджит шеэри ве этрафында яшагъан къадын-къызлар дегиль де, бутюн ярымаданынъ векиллери кельдилер, бош ер тапмакъ къыйын эди.
Ресмий программанен берабер сейирджилерге шенъ эглендже программа да багъышланды.
Башта миллий масалларнынъ къараманлары санагъа арабачыкъ гузель бахшышларны чыкъардылар.
Сонъра артистлеримиз аджайип байрам концерт программасыны такъдим эттилер. Кеманеджи Зарема Алиева ве онынъ кемане такъымы озь назик ве самимий иджрасынен концертни ачтылар.
Сервер Какура, Эдип Асанов, “Макъам” такъымы ве Афизе Касара, Эльнара Кучук, Гулизар Бекирова сейирджилерге баарь, ана, къадын ве яшайышнынъ дигер аджайип тарафларынен багълы тюркюлерни багъышладылар.
“Теселли”, “Джемиле” балалар такъымлары энди белли ве сейирджилеримиз севген оюнлар, тюркюлер ве янъы номерлеринен къувандырдылар. Айрыджа сейирджилерни энъ кичик артистлер тааджиплендирдилер.
Бутюн байрам тедбири девамында санада Къадын-къызлар бирлешмесининъ идаре азалары олдылар. Оларнынъ ярдымынен байрам самимий ве джанлы кечти. Оларгъа сейирджилер ве шахсен озюм адымдан буюк тешеккюр бильдирмеге истейим.
Гульнара АБИЕВА
Фикирлер
Фикирлеринизи языныз