Билял Мамбет
29 Апр 2009 | Дигер
27-апрельде белли шаир ве журналист, Къырымтатар язы-джылар бирлигининъ азасы Билял Мамбетнинъ юреги девамлы хасталыкътан сонъ урувдан токътады. Сафларымызны истидатлы, озьгюн иджаткяр, алчакъго-нъюлли, мерхаметли ве миллетпервер инсан терк этти.
Билял Мамбет 1935 сенеси 2-февральде Судакъ районынынъ Къоз коюнде догъды. Дешетли сюргюнлик йыллары онынъ къорантасы Самаркъанд виляетине тюшти. Анда о орта мектепни, Тиджарет институтыны битирди, Ташкентке ёлланылды ве анда зенааты боюнджа бир къач йыл чалышты.
1965 сенеси Б. Мамбет «Ленин байрагъы»на келип, 30 йыл девам эткен газетчилик зенаатына кирише. Бунынънен берабер о эдебий фаалиетини джиддийлештире, ве, нетиджеде, черик асыр ичинде «Ягъмур» (1970), «Анамнынъ тюркюси» (1973), «Баарь нагъмелери» (1975), «Тылсымлы сандыкъ» (1977), «Тёпемизде кунеш» (1981), «Япракъ устюнде тамчылар» (1983), «Дагъ лялеси» (1985), «Меним истегим» (1988), «Къоз эфсанеси» (1995) киби шиирий джыйынтыкъларыны чыкъармагъа наиль ола. Онынъ эм буюклер, эм де зияде балалар ичюн язгъан эсерлери акъкъында тили, шекили саде, мундериджиси терен ве тесирли, демеге мумкюн. Чюнки шаир халкъ омюрини, аньанелерини, урф-адетлерини яхшы билип, озь иджадында агъыз яратыджылыгъы, ривает, дестанлар, аталар сёзлеринде олгъан маневиятымызны гъайрыдан ишлеп, бунынънен берабер озьгюн бедиийликни яратып, медениетимизнинъ инкишафына озь иссесини къошты.
1990 сенеси Билял Мамбет къорантасы иле Къырымгъа къайта ве о замандан «Достлукъ» адынен чыкъкъан «Къырым» газетинде чалышмагъа башлай, эдебий фаалиетини девам эте, халкъымызнынъ авдети, Ватанда ерлешюви, акъ-укъукълары ичюн курешнен багълы мевзуларны, олгъан вакъиаларны айдынлата. 1995 сенеси сагълыгъы зайыфлашкъаны себебинден, нефакъагъа чыкъмагъа меджбур ола. 2008 сенеси онынъ «Дагълар эфсанеси» джыйынтыгъы дюнья юзюни коре.
Хасталыгъыны кимсеге дуйдурмагъа севмеген ве онынъле сонъки кунюнедже курешкен Билял агъа аджайип ватанпервер къорантанынъ башы эди.
Билял Мамбет вефат эткени мунасебетинен онынъ омюр аркъадашы Урие ханым Эдемовагъа, балалары, торунлары ве дигер якъынларына терен тазие бильдиремиз. Эминмиз, о озь гузель эсерлери иле халкъымызгъа даа чокъ-чокъ йыллар хызмет этеджек ве бунынъле онынъ хатырасында яшайджакъ.
Миллий Меджлис азалары.
1990-1995 сс. «Къырым» газетинде семерели чалышкъан, маариф мевзуларынен сыкъы огърашкъан белли языджымыз, миллий журналистика ветераны
Билял МАМБЕТ
вефат эткени мунасебетинен онынъ къорантасына терен тазие бильдиремиз ве баш сагълыгъы тилеймиз.
Алла рахмет эйлесин.
«Къырым» газети ве «Йылдыз» меджмуасынынъ муарриетлери, «Маарифчи» бирлешмеси .
Фикирлер
Фикирлеринизи языныз