Эйилик ве адалет гъаелерининъ тешвикъатчысы бестекяр Эльвира Эмир музыка севдаларына 9 эсерден ибарет аудио-альбом такъдим этти
Майыс 21-де намлы бестекярларымыздан бири, Украина композиторлар миллий бирлигининъ азасы, Къырым Мухтар Джумхуриети эм де В.Косенко адына мукяфатларынынъ лауреаты, халкъара фестиваллер ве бестекярлар форумларынынъ иштиракчиси Эльвира Аппаз къызы Эмирнинъ Бутюндюнья къырымтатар конгресси черчивесинде Украина академик драма театринде симфоник оркестри иджрасында аудио-дискке язылгъан симфоник эсерлери ве «Авдет» адлы 2-нджи симфониясынынъ такъдими олып кечти.
Тедбирни Миллий театримизнинъ артисти Фатма Асанова алып барды. О, Э.Эмирнинъ иджат ёлуны къыскъадан икяе этти.
Эльмира ханым 1963 сенеси Къазахыстан Джумхуриетининъ Чимкент шеэринде дюньягъа кельди. 1989 сенеси Ташкент девлет консерваториясынынъ назарий бестекярлыкъ шубесини битирди.
2007 сенеси бестекяр «Алемдар Къарамановнынъ хатырасы» адлы конкурста кемане жанры боюнджа ве 2008 сенеси Украинада бестекярлар арасында кечирильген бала эсери ярышында биринджи ерни алды.
Онынъ иджады юксек зенаат усталыгъы иле айрылып тура. Эльвира ханымнынъ иджадында нео-романтик усулы устюндир. Онынъ музыкасында улькеден, табиаттан ве джемиетнинъ аятындан алынгъан эмоциональ дуйгъулар музыка вастасынен бериле. Онынъ эсерлеринде фаджиалы аэнклернен бир сырада, охшайыджы ве лирик аэнклер де бар ве олар чешит-тюрлю жанрларны къаврап ала.
Булар симфониялар, вокал, фортепиано, хор эсерлери, романслардыр.
Муэллифнинъ корюмли эсерлери арасында буюк симфоник оркестри ичюн язылгъан «Симфония-поэма», дёрт къысымдан ибарет 2-нджи симфония, симфоник оркестр ичюн эсерлер, шу джумледен, кемане ве оркестр ичюн эки къысымдан ибарет «Къырым орьнеклери», «Байрам увертюрасы», труба ве симфоник оркестри ичюн язылгъан «Арабалар» халкъ йырынынъ транскрипциясы, «Татарский триптих» бедиий фильмине языл-гъан музыка ве дигерлери барлар. Бестекяр озь иджадында эйилик ве адалет гъаелерини тешвикъат эте.
Эльвира Эмир симфоник эсерлеринен джиан музыка санатына мунасип иссе къошты. Онынъ иджадына Украина эм де четэльде юксек къыймет кеселер.
Концертте муэллифнинъ «Къырым орьнеклери», «Севги дуйгъусы» лирик эсери, аудио-альбомгъа кирсетильген 9 симфоник эсеринден бири, «Сюргюнлик» деп адландырыл-гъан биринджи симфониянынъ бир къач парчасы янъгъырады. Сонъра «Авдет» адлы 2-нджи симфониянынъ премьерасы олды. Эсер 2009 сенеси дюнья юзюни корьди.
Бу эсерни яратув гъаеси муэллифте 1987 сенеси, яни ватанпервер инсанлар алып баргъан куреш саесинде догъды. Симфония дёрт къысымдан ибарет. Биринджи къысмы «Арекет», экинджи къысмы «Асретлик», учюнджи къысымы «Эджель», дёртюнджи къысмы «Уриет ёлу», деп адландырылгъан.
Сонъра «Эй, азиз миллет» (И.Асаниннинъ шиири) медхиеси ве «Байрам увертюрасы» янъгъырады.
Эр бир эсер гурьдели эльчырпмаларнен къаршыланды ве сейирджилер муэллифке чечеклер багъышладылар.
Концертнинъ сонъунда Миллий Меджлис реиси Мустафа Джемиль, Багъчасарай районы девлет мемуриетининъ реиси Ильмий Умеров, Къырымтатар къадын-къызлар бирлигининъ реиси Сафинар Джемилева, Рескомнац ККъ Идаресининъ ёлбашчысы Эдем Дудаков, белли йырджы Рустем Меметов сёзге чыкътылар. Олар бойле аджайип музыка эсерлери яраткъаны ичюн Эльвира ханымгъа тешеккюр бильдирдилер ве иджадий мувафакъиет тиледилер.
Озь невбетинде Э.Эмир вакъытларыны аджымай концертке кельген инсанларгъа миннетдарлыкъ бильдирди ве илериде даа эмиетли, озьгюн эсерлер язмагъа тырышаджагъыны айтты.
Такъдими олып кечкен мезкюр аудио-альбомнынъ дюнья юзюни корюви нети-джесинде музыка севдаларында Эльвира ханымнынъ симфоник эсерлерини динълемек имкяны пейда олды.
Бу аджайип аудио-альбом Эдем Дудаковнынъ лейихасы иле Иззет Стаптиев эм де «Къырым» фондунынъ малиевий ярдымынен чыкъты.
Наджие АМЕТОВА.
Фикирлер
Фикирлеринизи языныз