Халкъымызнынъ эйиаллыгъы огърунда…
30 Мая 2009 | Миллий Меджлис
Бутюндюнья къырымтатар конгрессининъ Декларациясы
Биз, Бутюндюнья къырымтатар конгрессининъ, дюньянынъ 12 девлетиндеки 162 джемаат ве сиясий-ичтимаий тешкилятыны темсиль эткен делегатлары, къырымтатар халкъынынъ тарихий Ватаны - Къырымда ильк дефа берабер топланыр экенмиз:
-къырымтатар халкъынынъ Бирлешкен Миллетлер Тешилятынынъ Уставы, Инсан укъукъларынынъ умумий декларациясы, Тамыр халкъларнынъ укъукълары акъкъында декларацияда ве инсан эм де халкъларнынъ укъукъларына аит халкъара укъукънынъ бутюн дигер нормаларында танылгъан бутюн акъ-укъукълары ве сербестлигининъ къорчаланмасындан келип чыкъаракъ:
-къырымтатар халкъынынъ озь топрагъы - Къырымда акъ-укъукъларыны гъайрыдан тиклев ве теминлев саасында кесен-кес денъишмелер олма-гъанындан гъает теляшлангъанымызны бильдиререк;
-къырымтатар халкъынынъ сиясий, икътисадий, маневий ве медений джеэттен гъайрыдан тикленмеси огърунда аджеле ве семерели чарелернинъ корюльмегени онынъ миллет оларакъ сакъланып къалмасыны телюке алтына къойгъаныны анълаяракъ;
- къырымтатар халкъы укъукъларынынъ толусынен гъайрыдан тикленмеси Украина девлети ве Къырымнынъ тамыр халкъынынъ адалетлик, демократия, инсан укъукъларыны урьмет этюв, намуслылыкъ ве акъсымлавсыз принциплерине эсаслангъан мунасебетлернинъ инкишафына сильтем оладжагъына эмин олгъанымыз алда;
Сонъу 2-нджи саифеде.
Башы 1-нджи с аифеде.
- 1944 сенеси майыс 18-де СССР коммунист режимининъ къырымтатар халкъына нисбетен япкъан геноциди ве халкънынъ он йыллар девамында сюргюнлик ерлеринде зорбалыкънен тутулгъанынынъ акъибетлерини ялынъыз Украина девлети ёкъ этип оламайджагъыны ве, демек, бу БМТ, Авропа Бирлиги, Авропа Шурасы ве дигер халкъара институтларнынъ айрыджа дикъкъаты астында булунмакъ кереклигини анълагъанымыз алда;
-дюнья халкълары ве миллетлери арасында барышыкълыкъ ве гонъюльдешликнинъ эльде этильмесине, Украина ве къырымтатар халкъы диаспорасынынъ джемаат тешкилятлары фаалиет косьтерген, девлетлер арасында бири-бирини анълавны инкишаф эттирюв ве достане мунасебетлернинъ пекитильмесине олдукъча ярдым этмек ниетинде булунгъанымыз алда;
- бутюн кучь-къудретимизни, бильгимизни Къырымнынъ эйиаллылыгъы ве къырымтатар халкъынынъ озюнинъ сиясий статусыны сербест бельгилев ве икътисадий, ичтимаий ве медений инкишафыны сербест амельге кечирмек укъукъыны теминлевге догърултмакъ киби алидженап вазифени огюмизге къойгъанымыз алда къырымтатарларнынъ, чешит девлетлерде мейдангъа кетирильген ве мезкюр Декларацияда къайд этильген принциплер, макъсат ве вазифелерге мувафыкъ озьара эмекдашлыкъта иштирак этмек истегини бильдирген,
джемаат тешкилятларынынъ арекетлерини бирлештирген ве координирлеген «Бутюндюнья къырымтатар конгресси» халкъара джемаат тешкилятынынъ мейдангъа кетирилювини
ИЛЯН ЭТЕМИЗ.
Бутюндюнья къырымтатар конгресси меркезий органларынынъ булунгъан ери Къырым, Украина.
-Къырымтатар Миллий къурултайы Бутюндюнья къырымтатар конгресси, бунынъ киби де онынъ эркянында бирлешкен джеми къырымтатар джемаат тешкилятлары ичюн, къырымтатар халкъынынъ алий, толу векялетли органы олгъаныны
БЕЯН ЭТЕМИЗ.
Къырымтатар Миллий къурултайы, бунынъ киби де онынъ органлары ве вазифедар шахыслары, Бутюндюнья къырымтатар конгрессининъ эркянына кирген джеми къырымтатар джемаат тешкилятлары иле азаларынынъ сайысы, фаалиет косьтерген девлети ве регионындан къатий назар мусавий ве сайгъы мунасебети эсасында эмекдашлыкъны инкишаф эттиреджек.
Къырымтатар халкъынынъ эйиаллылыгъы огърунда япкъан бутюн арекетлеримиз адалет, демократия, мерхаметлик, бутюн инсанларнынъ, миллий менсюплигинден къатий назар, сиясий, икътисадий, медений, диний ве дигер къануний акъ-укъукъларына къатты риает этюв принциплерине базанаджагъыны
ТЕСБИТ ЭТЕМИЗ.
Бутюндюнья къырымтатар конгрессинде къабул этильди.
Къырым, Акъмесджит, 2009 сенеси, майыс 22.
Фикирлер
Фикирлеринизи языныз