Дёртюнджи кунь
Декларацияны къабул этерек, Бутюндюнья къырымтатар конгресси озюни тешкилят оларакъ къурулгъаныны тасдикълады. Эбет, Конгресс даа къурум оларакъ шекилленеджек, шимди исе онынъ ишлерини алып бармакъ ичюн къабул олунгъан Низамнаме боюнджа Кенъеш къурмакъ керек. Шу Кенъешке чешит мемлекетлерден кельген диаспора темсильджилери ве Къырымдан векиллер сайланды.
Къырымдан беш адам, Тюркиеден учь адам, Романиядан эки адам, дигер девлетлерден бирер адам шу Кенъешке киреджеги къарар къабул олунды.
Бундан гъайры, Кенъешнинъ башы, яни Президенти мытлакъа Къырымдан олмалы, деп фикир юрсетильди. Топлангъанлар шу фикирге къолтуттылар. Мустафа Джемиль Рефат Чубарнынъ намзетини косьтерди, лякин бир шарт къойды. Къурултайнынъ невбеттеки сессиясында Миллий Меджлис реиси сайламакъ меселеси музакере этильгенде, Р.Чубар бу сайлавлардан башыны чекмейджегине эмин олмакъ истегенини айтты.
Рефат Чубаргъа къаршы дигер намзетлер косьтерильмеди ве делегатларнынъ чокъсу рейлеринен о бу вазифеге сайланды.
Кенъешнинъ дигер азаларыны эр бир диаспора озю сечип айырды ве косьтерди.
Диаспорадаки ватандашларымыз намзетлик меселесини озьлери чездилер. Бойлеликнен, Тюркиеден Наиль Айтар, Умют Шилит, Месут Ор; Романиядан - Амет Варол, Аджиакъай Саладдин; Америка Къошма Штатларындан - Айля Баккал; Озьбекистандан - Нусрет Джемилев; Френкистандан - Ревзие Аметшаева; Къыргъызыстандан - Энвер Халилов; Алманиядан - Ахмет Озай; Полониядан - Селим Хазбиевич; Русиеден - Энвер Рамазанов; Булгъарыстандан - Хошгун Насуф Кенъешке кирдилер.
Канада озь намзетини косьтермеди. Литвадан векиллер кельмегени себебинден теклиф этильген векили кирмеди.
Къырымдан Р.Чубар дёрт намзетни косьтерди ве бу адамларнен о семерели чалышмакъ ниетинде ол-гъаныны айтты. Лякин Къырымдаки делегатлар дигер намзетлерни де косьтермеге башладылар. Нетиджеде, Конгресс кенъешине Али Хамзин, Али Озенбаш, Абдураман Эгиз, Февзи Якъубов, Айше Сеитмуратова, Сафуре Каджаметова, Ибраим Чегертма, Исмет Юксель, Эмине Авамилева, Энвер Аблякимов, Айдер Исмаиловнынъ намзетлери косьтерильди.
С.Каджаметова ве И.Чегертма озь намзетлерини рейден алдылар. И.Юксель дигер мемлекетнинъ ватадашы оларакъ Къырымдан сайлана бильмейджек киби танылды.
Сайлавлар кечирильди ве булардан дёрт адам: Ф. Якъубов - 247 рей, А. Эгиз - 206, А. Сеитмуратова - 204, А.Хамзин - 191 рей алып, Кенъешке кирдилер. Дигер намзетлер рей боюнджа кечмеди.
Бойлеликнен, Конгресснинъ Кенъеши сайланды. Сонъ Р.Чубар сёзге чыкъып, чалышмаларнынъ нетиджеси озюмизге багълы, деп айтты. Конгрессни топламакъ ичюн гъайрет косьтерген, тешкилий ишлерни алып баргъан, айры Тешкилий комитетнинъ азаларына буюк тешеккюр бильдирди. Ондан гъайры, базы ватандашларымыз бу тедбирде иштирак этмегенине языкъсынды.
Р.Чубар Кенъеш ярындан башлап ишке киришеджегини ишандырды. О, Къырымда отькерильген меджлислерге сайлавлар насыл кечкени акъкъында бир къач сёз къошты. Онынъ айткъанына коре, ватандашларымызнынъ фааллиги юксек.
Топлашувнынъ сонъунда Мубеин Алтан Конгресснинъ Украина Президенти, Юкъары Радасы ве Халкъара тешкилятларгъа Мураджаатыны окъуды (газет саифелеринде айры дердж олуна).
Бу Мураджааткъа Киевде ачлыкъ туткъан ватандашларымыз акъ-къында малюмат кирсетмек меселеси къоюлды, лякин бу айры весикъа оларакъ язылсын, деп къарар алынды ве сонъра Украина президенти ве Баш Везири адларына махсус телеграмма ёлланылды.
Ибраим Чегертма, Къуртсеит Абдулла, Синавер Къадыр ве Ибраим Чалбаш тарафындан халкъымыз озь азатлыгъы ичюн курешкен миллет оларакъ илян этильсин, деген теклиф кирсеттилер. Бу меселени Къурултай чезеджек, деп айтылды.
Невзат Ялчинташ Конгресс демократик шекильде кечкени ве къырым халкъы озь барлыгъыны дюньягъа косьтергенини къайд этти. О, аркъанъызда 70 миллионлыкъ тюрк девлети тура, деп ватандашларымызгъа озюне эминлик бермеге тырышты.
М.Джемиль Конгрессни къапатаракъ, делегатларгъа да, мусафирлерге де, тешкилятчыларгъа да - эр кеске тешеккюрлер айтты ве онынъ нетиджеси эйи оладжагъына ишанч бильдирди.
В.СЕЙДАМЕТОВА.
Фикирлер
Фикирлеринизи языныз