Тантаналы тедбирлер
18-майыста QIRIM HABER AJANSI - QHA («Крымские новости») хаберлер агентлигининъ фаалиетине учь йыл толды. Агентликнинъ махсулатындан чокъсу кутьлевий хаберлер васталары, меркезий ве ерли акимиетнинъ органлары, четэль векиллери, халкъара ве джемаат тешкилятлары къулланалар. Шимди агентлик хаберлерни рус, инглиз ве тюрк тиллеринде такъдим эте.
23 майыста Къырым академик музыкалы-драма театринде бу йылдёнюмге багъышлангъан тантаналы тедбир олып кечти. Мында Миллий Ме-джлис реиси Мустафа Джемиль, Везирлер Шурасынынъ биринджи муавини Азиз Абдулла, Юкъары Шурасынынъ даимий комиссиянынъ реиси Ремзи Ильясов ве Украина Президенти Даимий Векилининъ муавини Ибраим Мамутов иштирак эттилер. Чыкъышта булунгъанлар Украина ве Къырым хаберлер мейданында агентликнинъ буюк иссе ве къыйметини къайд эттилер.
Бундан гъайры хайырлав сёзнен информация боюнджа джумхуриет комитетининъ реиси Шевкет Мемет, Багъчасарай район девлет мемуриетининъ башы Ильми Умеров, Истанбулдаки къырымтатар медениет джемиетининъ реиси Джелял Ичтен, Акъмесджиттеки Тюркие джумхуриетининъ фахрий консулы Сейран Османов, джемаат тешкилятларынынъ векиллери, джемаат эрбаплары чыкъышта булундылар.
«Къырым», «Макъам» музыкалы такъымлары, Эдип Асанов, Афизе Касараева, Ление Измайлова, Рустем Меметов ве дигерлери бу тантаналы тедбирни яраштырдылар.
Фикирлер
Фикирлеринизи языныз