Америка Къошма Штатларында БМТ (ООН) янында тамыр халкълар меселелери боюнджа Даимий Форум чалышмакъта. Бу сене майыснынъ сонъунда, яни 18-29-майыста бу форумнынъ 8-нджи сессиясы олып кечти.
Халкъымызнынъ векиллери де бу тедбирде иштирак эттилер. Миллий Меджлис адындан Форумгъа «Бизим Къырым» халкъара джемаат тешкилятынынъ азасы Февзи Амзаев ве Нью-Йоркта окъугъан “The New School” университетининъ магистр-студенти Али Чабук бардылар.
Форум азаларына къырымтатарлар, оларнынъ земаневий дурумы ве эсас меселелери акъкъында толу малюмат берильди. Шу джумледен, Къырым биз ичюн екяне ватан олгъаны, эвельде бизим миллий девлечилигимиз олып, ёкъ этильгени ве къырымтатарларнынъ агъырдан-агъыр сюргюнлиги, онынъ нетиджелери ве о заман япылгъан акъсызлыкънынъ шимдики девамы акъкъында икяе этильди.
Меджлис векиллери Форумнынъ азаларына мураджаатта булунып, БМТ ве халкъара джемаатчылыкънынъ дикъкъатыны къырымтатарларнынъ талаплары чезильмек кереклигине джельп этмеге риджада булундылар.
Бундан гъайры «Къырымтатарлар» серлевалы семинар отькерильди. Семинарда къырымтатарлар, оларнынъ тарихий кечмиши акъкъында тафсилятлы малюмат берильди, къырым миллий меселесининъ чезилюв ёллары музакере этильди. Даимий Форумнынъ тарихында бу ильк къырымтатарларгъа багъышлангъан семинар олды.
Семинарда БМТ янында тамыр халкълар боюнджа Даимий Форумнынъ, Украина, Русие ве Тюркиенинъ БМТ миссиясы темсильджилери эм де джемаат тешкилятлары ве тамыр халкъларнынъ векиллери иштирак эттилер.
Бизим ватандашларымызнынъ БМТ Даимий Форумында иштирак этмеси чешит джемаат тешкилятлар ве дигер тамыр халкълар векиллеринен алякъа багъламакъ эм де илериде бу сой лейихаларда иштирак этмек ичюн имкян яратты.
Меджлиснинъ матбуат
хызметинден.
Фикирлер
Фикирлеринизи языныз