Къарасувбазар районынынъ Копюрликой коюнде 10 йылдан берли яшагъан Алиме битай Томакъова 17-июньде мубарек 100 яшыны толдурды. Бу мунасебетнен онынъ къызы Сафие ханымнынъ кирада яшагъан эв азбарында, узакъ-якъындан кельген мусафирлер чешит емеклернен донатылгъан софралар этрафындан ер алдылар.
Бу козьайдын тедбирини алып баргъан кой медениет сарайынынъ хадими Лиля Смаилова Алиме битайнынъ къыскъа терджимеиалы акъкъында бойле деди - Алиме битай 1909 сенеси Айсерез коюнде еди балалы аиледе дюньягъа келе. 1936 сенеси койдеши Ибраим Томакънен аиле къуралар. 1944 сенеси аиле башы Ибраим Томакъны эмек орддусына алалар. Учь баланен Уралгъа сюргюн олгъан Алиме ёлда эки баласындан марум ола.
Сабийлерни кефинсиз вокзалда къалдырмагъа меджбур олгъан ана бир баланен Урал дагъларында дагъ кесювде чалыша. Бираз вакъыттан сонъ, яни 1950 сенеси Озьбекистаннынъ Андижан виляетине коче, Палванташ къасабасында яшай. Анасы ве догъмушларына къавуша. 1953 сенеси омюр аркъадашы Ибраим Томакъ эмек ордусындан бошап Палванташкъа келе, докъуз йыл асретини чеккен аилесине къавуша. Арды-сыра эки эвляды ола, Къырымда догъгъан Мамед Озьбекистанда кечине. Алиме битайнынъ анасы Айше битай да 100 яшыны кечип гъурбетте къала. Дюнья адлы гемининъ хышымына 100 йыл даянгъан битайнынъ эки къызы сагъ-аман бир кой шурасында яшайлар. Алиме битайнынъ омюр аркъадашы Ибраим деде 1995 сенеси Озьбекистанда кечине. 100 йыл омюр корьген Алиме битайгъа 12 торун ве торунчеден де 14 торунча-торундже корьмек насип олгъаныны сёйледи Лиля ханым.
Бундан сонъ сёз кой шурасынынъ реиси Назим Билял огълуна берильди. О, Алиме битайны 100 яшынен хайырлап, кой шурасы адындан бахшыш такъдим эти. Район мемуриет реисининъ тасиль ве медениет боюнджа муавини Аким Чолахаев, Бутюн Къырым муфтиси Эмирали Аблаев, Миллий Меджлис реисининъ биринджи муавини Рефат Чубаров ве Къырым Мухтар джумхуриетининъ эмек ве социаль везирлигининъ векили Украина Президенти адындан хайырлап, бахшыш ве ярлыкъ такъдим эти.
Тедбирни «Багъча-Эли» ансамбли яраштырды.
Мен шуны айтмакъ истер эдим. Мухбирлик девамында 100 яшыны кечкен беш инсаннен корюшип, субетлештим. Булардан хатырасы къавий олгъан ихтиярнынъ бири Алиме битайдыр. Онъа «узакъ омюр яшамакънынъ сыры недер ибарет - денильген суальге: -«Манъа кучьни Алла бере, мен гедже-куньдюз Къуран окъуйым, Танърыма ишанып яшайым», - деди Алиме битай. Даа «Мени де гъамдан азат эйле» тюркюни йырлап берди. Кельгенлерге озь тешеккюрини бильдирди.
Певат АДЖИРЕДИН.
Фикирлер
Фикирлеринизи языныз