Премьера арфесинде Сана вастасынен 18-майыс фаджиасынынъ акс эттирюви
27 Июня 2009 | Миллий медениет
Якъын вакъытта энъ эсли-башлы языджымыз Рустем Муедин 90 яшыны толдураджакъ. Миллий театримизде 18-майыснынъ арфесинде, Миллий Меджлис теклиф эткен тедбирлер сырасында эдипнинъ юбилейине багъышланып, онынъ «Сёнген йылдызлар» адлы пьесасыны саналаштырмакъ козьде тутулгъан эди. Бу акъта биз Рустем агъагъа суаллер бердик.
Р.М.: - Оны азырлавда баягъы ишлер алып барыладжагъы ичюн (декорация ве кийимлер азырламакъ), догъум кунюме етиштирип оламайджакъ эдилер. Театрнинъ баш режиссёры Билял Биляловнен анълашкъанымызгъа коре, 28-июльде оны корьмеге мумкюн оладжакъ. Иште, догъгъан кунюм де къайд олунаджакъ.
- Демек кириш меселеси сербест оладжакъ?
Р. М.: - Буны темеллидже анълатмам иджап эте. Эдебиятымызнынъ тарихында даа докъсан яшына келип, юбилейи япылгъан языджы олмады. Бу себептен меним фаалиетиме дикъкъат айырылыр, деп тюшюндим де, Рескомнацкъа мураджаат эттим. Озюмни таныткъан сонъ, юбилейим ичюн пара олмагъаныны бильдирдилер. Иште, эдебиятымызгъа мунасебет.
«Дюнья мерхаметли адамларсыз дегильдир», - («Мир не без добрых людей») нафиле айтылмагъан. Бу меселени театрнинъ баш режиссёры Билял Билялов чезди. Пьеса санада ойналаджакъ премьера куню манъа, сой-сопум ве таныш-билишимни давет этмек ичюн сейирджи ерлери айырып, азырлыкъ корьген вакъытларындаки масрафларнынъ бир къысмыны одемек ичюн, дигер сейир-джилерге билет сатмагъа меджбур олгъаныны айтты.
- 18-майыс фаджиасы - кениш мевзу. Пьесада Сиз оны насыл ифаде этесинъиз?
Р.М.: - Темсильнинъ башында дженкнинъ ильки куньлери тасвирлене ве халкъымызнынъ ватангъа не къадар садыкъ олгъаны косьтериле. Сонъ, фашистлер келип къылынгъанлары ве, ниает, Советлер къайтып, миллетимизни сюргюнге огъратувларынен екюнлене.
Фикримдже, шу мешакъатлы куньлерни башындан кечирген халкъымыз о девирлер унутылмайып, тарихымызда къаладжа-гъыны анълар. Генчлеримиз исе, миллетимизнинъ башына нелер кельгенини озь козьлеринен корерлер. Бу пьеса халкъымызнынъ энъ къара куньлерини хатырлаткъаны ичюн, эсерге меракъ айрыджа олур, деген фикирдем.
- Сагъ олунъыз. Пьесанъыз даима аншлаг иле кечмесини тилеймиз.
Э. АСАНОВА.
Фикирлер
Фикирлеринизи языныз