Эмшире усталыгъы ярышынынъ гъалиби
27 Июня 2009 | Миллий медениет
Ялта шеэринде X Джумхуриет «эмшире иши» ихтисасы боюнджа зенаат усталыкъ ярышы (конкурс) олып кечти. Конкурста Акъмесджит, Акъяр, Кезлев, Керчь, Ялта шеэрлеринден генчлернен бир сырада Керчьтеки Г.Петрова адына тиббият колледжининъ 3-нджи курс талебеси Эльзара Абдулминова да иштирак этти.
-Къырымнынъ тиббият колледжлеринден кельген ярышнынъ бутюн иштиракчилери джиддий, къуветли, яхшы азырлангъан эдилер, - деди Эльзара. - Олар конкурснынъ вазифелерини мувафакъиетнен беджердилер. Амма меним бильгилеримни жюри энъ яхшы, деп эсаплагъанына къуванам ве гъурурланам.
Эльзара Абдулминова Ленин районы Чурбаш (Приозерное) коюндеки мектепни битирди. 2006 сенеси Керич тиббият колледжине окъумагъа кирди. Буюк меракънен бильгилерге ынтылды. Фааль арекетчен къызны бирден группанынъ ребери (староста) оларакъ сайладылар. Студентлернен берабер чешит тедбирлерде иштирак эте, кезинтилерге бара, амма Эльзаранынъ фикирине коре, энъ муими - окъумакътыр.
Иште, Э.Абдулминова учь сенеден берли аля окъуй. Эр сене эмширелер арасында отькерильген зенаат усталыкъ ярышларында иштирак эте. Колледж ичинде кечирильген биринджи ярыштан башлап Эльзара гъалип чыкъты. Сонъра онъа Бутюнкъырым конкурскъа бармагъа теклиф эттилер. Къызгъа колледжнинъ оджалары, директоры, курсдашлары рухий джеэттен къолтутмагъа тырышалар, меслеат берелер.
Иште, конкурста яш эмширелер тестлерден кечтилер, амелият (хирургия), педиатрия, терапия боюнджа озь бильгилерини косьтердилер. Эльзара Абдулминова биринджиликни алды, онъа Сагълыкъны сакълав везирлигининъ фахрий ярлыгъы, бахшышлар, чечеклер такъдим этильди. Жюри азалары, оджалар, достлары Эльзараны хайырлап, онъа мувафакъиет ве инсанларгъа хасталыкъларнен курешмеге ярдым этмекни тиледилер.
Наджие БАТАЛОВА.
Фикирлер
Фикирлеринизи языныз