Онынъ ахлягъы Къуран эди
12 Мар 2008 | Ислям Нуру
Март 19-дан 20-ге кечер геджеси Мевлюд Къандилидир
Пейгъамбер Эфендимиз хиджрий айлардан олгъан Ребиуль эвель айынынъ 12-нджи геджеси сабагъа якъын дюньягъа кельди. Бу гедже Пейгъамберимиз Азр. Мухаммед (с.а.в.)нинъ догъгъан кунюдир.
О бизге Аллахкъа иман этип Оны севмеге, догъру ёлны тапмагъа, ибадетлернен аятымызны анъламлы япмагъа, догърулыкъны, эманетни къорумагъа, къомшулыкъ ве акърабалыкъ багъларыны козетмеге, оксюзлерни къорчаламагъа, эр кеснинъ ве эр шейнинъ акъкъыны козетмеге, кимсени ынджытмамагъа, эйилик япмагъа, яхшы ве файдалы инсан олмагъа тевсие эткен.
Эм Пейгъамбер эфендимизнинъ догъгъаны, эм Меккеден Мединеге хиджрети, эм де о бир дюньягъа къайтмасы Ребиуль эвель айында олды. Ребиуль эвель айында Ислям тарихында эм эзиетли (Пейгъамберимизнинъ ахиретке къайткъаны киби) эм де севинчли (Пейгъамберимизнинъ догъувы киби) аллар юзь берди.
Юдже Раббимизнинъ севгили къулу ве Ресулу Азр.Мухаммед (с.а.в.) догъгъанда дюнья нурнен толды. Сулейман Челеби “Весилетун-Неджат” адлы китабыны язды. Бу китапнынъ бир къысымыны Пейгъамберимизнинъ догъумына айырды. Бу китапны мусульманлар чокъ йыллардан берли окъуйлар.
Пейгъамбер Эфендимиз догъмаздан эвель инсанлыкъ алеми инкъираз, сыкъынты, ахлякъсызлыкъ ичинде эди. Инсанлар бири-биринен дженклеше, бири-бирине зульмет эте эдилер. Адалет ёкъ эди. Къадынлар базарларда сатылгъан бир мал (эшья) киби эди. Яш къызлар тирилейин топракъкъа комюле эдилер. Зенгин олгъанлар факъыр ве ёкъсулларгъа акъсызлыкъ япа эдилер.
Пейгъамберимизнинъ догъгъан кунюнден башлап инсанлыкъ ичюн, джихан ичюн янъы бир дёнюм башланды. Бундан сонъра дюньяда куфюр ве зулум олмайджакъ, акъсызлыкълар сонъуна келеджек, эр кеске акълар бериледжек эди. Онынъ догъумы бутюн инсанлыкъ ичюн бир рахмет оладжакъ эди. Бу вазиетни Юдже Раббимиз бойле анълата: “Эльбетте, Аллах инангъанларгъа озьлеринден аетлерни окъуп берген, оларны (ярамайлыкълардан ве инкярдан) паклеген, оларгъа Китап ве Икмет огреткен бир Пейгъамбер ёлламакънен Аллах муминлерге буюк бир лютфте булунгъан. Эбет, эвель олар ап-ачыкъ адашмакъта эдилер” (Ал-и Имран, 164).
Севимли Пейгъамберимиз ондан дин недир, деп сорагъанларгъа дин гузель ахлякъ олгъаныны сёйлеген ве онынъ омюри гузель ахлякънынъ энъ гузель орьнеги олгъан. Мевлюд Къандили Севимли Пейгъамберимизни таныяракъ аятымызны гузель ахлякънен гузеллештирмек ичюн бир фурсаттыр. Мевлюд Къандили Севимли Пейгъамберимизнинъ чокъ севген балаларгъа Оны танытмакъ ичюн бир фурсаттыр. Пейгъамберимизнинъ догъум йылдёнюмлеринде окъулгъан мевлюдлерни сайгъы иле динълемек, Онынъ мубарек рухуна салят ве селям окъумакъ ич шубесиз Пейгъамберимизге олгъан терен севги ве урьметнинъ бир ифадесидир. Пейгъамберимизге урьмет ялынъыз бу геджеде мевлюд окъумакънен битмей, Онынъ ахлякъ ве фазилет толу аятыны огренмек ве ондан орьнек алмакъ биринджи вазифелеримиздир. О заман Онынъ севгисини ве хошнутлыгъыны къазанырмыз.
Севгили Пейгъамберимиз Азр. Мухаммед ондан эвельки пейгъамберлер киби тек бир топлулыкъкъа я да миллетке дегиль де, бутюн инсанларгъа пейгъамбер оларакъ ёлланылды. Оны башкъа пейгъамберлерден бу чизги фаркълы эте. Бойле вазиет Къуран-и Керимде бойле ифаде олуна:
“Биз сени бутюн инсанларгъа мудждеджи ве тенбилейиджи оларакъ йибергенмиз. Лякин чокълар буны бильмейлер.” (Себе, 28).
Инсанларгъа эр заман ве эр ерде Азр. Пейгъамбернинъ теблигъ эткени иляхий мисадж (бильдирюв, сёз) аятта кечирильген шекили олгъан Онынъ суннетине ихтияджы бар. Оны орьнек алмакъ, Къурангъа уймакътыр. Чюнки Азр. Айше (р.а.)нинъ ифадеси иле Онынъ ахлягъы Къуран эди. (Муслим, Мисафирин, 139). Къуран-и Керим Азр. Мухаммед (с.а.в.)нинъ инангъанлар ичюн энъ гузель орьнек олгъаныны бильдирмекте:
“Ант олсун ки, сизинъ ичюн, Аллагъа ве ахирет кунюне къавушмакъны умют эткен ве Аллахны чокъ анълагъан кимселер ичюн Ресулаллах энъ яхшы орьнектир.” (Ахзаб, 21). Башкъа аетте бойле дениле: “Айт ки: “Аллахны север исенъиз, меним пешимден кетинъиз, о вакъыт Аллах да сизлерни север ве гуняхларынъызны багъышлар…” (Ал-и Имран, 31).
Бу гедже нелер япмакъ керек?
Бутюн инсанлыкъ алемине хидает кетирген ве алемге рахмет олгъан бойле балабан бир Пейгъамбернинъ уммети олмакънен шерефленген биз муминлер бахтлымыз! Бу геджени чокъ эйи дегерлендирмек керек. Бу гедже, Акъмесджиттеки Кебир Джамиде биз Къырым Мусульманлары муфтиятынен бирликте акъшам намазындан сонъра мевлюд, Къуран, иляхийлер окъуйджакъмыз, субет япаджакъмыз. Бу геджени дегерлендирмек ичюн бутюн дин къардашларымызны Кебир Джамиге давет этемиз. Бу гедже чокъча Къуран окъумакъ, дуа этмек керек, къаза намазы, нафиле намазы къылмакъ лязим, Пейгъамберимизге чокъча салят ве селям кетирмек керек.
Мевлюд Къандилининъ бутюн инсанларгъа рахмет ве барыш кетирмесини теменна этемиз. Бутюн ислям алемининъ Мевлюд Къандилинен тебрик этемиз.
Юдже Раббим бизни бу гедже чокъ яхшы дегерлендирген къуллары арасына къавушмакъны къысмет этсин.
Эмин ПАТАН
Тюркие Диянет Ишлери Идаресининъ Украина ве Къырымдаки Темсильджиси.
Фикирлер
Фикирлеринизи языныз