Эркеклер ве къадынлар арасында мусавийлик бармы?
31 Мая 2008 | Дигер
Земаневий меселелер
19-майыста Къырым матбуат-клубында Украинада гендер мусавийлигине багъышлангъан актуаль меселелер музакере этильди.
2007 сенеси Украинада джемиетте гендер мусавийлигини тасдикълав программасы къабул этильди. Гендер мусавийлиги бу эркеклер ве къадынлар арасында мусавий укъукъ статусы етишкени ве мусавий имкянларнынъ мейдангъа кетирилювидир. О эм къадынларгъа, эм эркеклерге яшайышнынъ эр бир саасында мусавий иштирак этмеге рухсет бере. Украина гендер мусавийлиги саасында чешит халкъара весикъаларны имзалады ве гендер дискриминациясыны ёкъ этмек меджбуриетини алды.
2006 сенеси Украинада «Об обеспечении равных прав и возможностей женщин и мужчин» деген къанун къабул этильди. Лякин экспертлер тасдикълавына коре бу весикъа декларатив къала, чюнки Украинада гендер мусавийлиги бар, деп тасдикъламакъ мумкюн дегиль. Буны статистик малюматлар косьтерелер.
Мисаль ичюн, иш вакансияларынынъ алтмыш файызы экркеклер ичюн, къалгъаны эм эркеклер, эм къадынлар ичюн. Къадынларнынъ айлыгъы отуз файыз эксик. Милициягъа мураджаатларнынъ къыркъ файызы -аиледеки зорбалыкъкъа аит (сонъки сене Къырымда аилевий зорбалыкъ 3695 алны тешкиль этти, 900-и къадынлар тарафындан япылгъан).
Къадынларнынъ чокъсу девлет къурумларында чалыша. Анда исе айлыкъ буюк дегиль. Бунынънен берабер къадын эв иши ве бала тербиесинен меш-гъуль. Украинада къадынларнынъ тек дёртте бир къысмы бизнес кетишатыны незарет эте. Къадынлар къанунларны биле ве оларны эда этмеге, бергилерни озь вакъытында бермеге тырышалар.
Укюмет къурумларында да къадынлар аз. Мисаль ичюн Юкъары Рададаки 450 депутаттан тек 34-и - къадын, бу 7,6% (Къырымда исе юз депутаттан 16-сы къадын), виляет шураларында исе 11 файыз, район - 15, кой шураларында учьте бири.
Азырлагъан Гульнара АБИЕВА.
Фикирлер
Фикирлеринизи языныз