Чукъурчада догъгъан тюркю
28 Июня 2008 | Миллий медениет
Дженктен эвель Акъмесджит шеэрининъ дживарында Чукъурча кою (бугуньдеЛуговое) бар эди. 1941 сенесинде шу Чукъурчанынъ ашагъы тарафында Фазыл деген огълан яшай эди. Анасы ве бабасынынъ екяне баласы эди. Фазыл пек дюльбер экен. Къара гурь сачлы, озю де сельби бойлу бир йигит экен.
Чукъурча кою о вакъытлары 150 ханели кой эди. Фазыл акъкъында малюматны биз шу койнинъ сакини Февзие Бекировадан язып алдыкъ. О вакъытларда Февзие апте 11 яшында къызчыкъ эди. (Шимди о Жукова, 17-де яшай, онынъ телефоны 48-52-37). Февзие аптенинъ бильдиргенине коре Фазыл даима арбий урбада юре экен. Немсе фашистлери Ватанымызгъа басып киргенде, бу езитлер Фазылны Чукъурчанынъ багъчасы ичинде атып ташлагъанлар. Койнинъ халкъы бу йигитнинъ олюмине пек янып-куйген ве онъа багъышлап тюркю чыкъаргъан. Февзие апте бу тюркюнинъ сёзлерини эм сёйледи, эм йырлады, лякин нотагъа чыкъармакъны бильмегенимиз ичюн, биз бу йырнынъ тек сёзлерини бильдиремиз.
Шу Учькозьнинъ чешмесинден
Бир истикан сув ичтим,
Мен дюньягъа тоялмайып,
Достлар, дюньядан кечтим.
Бир сёйленъиз анама сиз
Ёлкъапуны япмасын,
Фазыл огълум кечинген деп,
Ана къальбин якъмасын.
Бар сёйленъиз Хатиджеме
Ал шалыны багъласын,
Фазыл ярем кечинген деп,
Яш юрегин якъмасын.
- Тюркюдеки Учькозь чешмеси шимди де Инвалидлер сокъагъында тура, лякин суву ёкъ, - дей Февзие апте.
Язып алгъан Г. ДЕРМЕНДЖИ.
Фикирлер
Фикирлеринизи языныз