Юлия Тимошенко: «Януковичнинъ укюмети бир саниеде 60 доллар тезликте хырсызлыкъ япа эди»
28 Июня 2008 | Миллий арекет
Биз яшагъан мемлекет
Баш везир ондан эвель чалышкъанлар джеблерине
10 миллиард гривня къойдылар, деп къабаатлады
Юлия Тимошенко эвельки укюметни кескин тенкъитке огъратты. О онъа «клептоманлар командасы» деп, мемурларны 10 миллиард гривня хырсызлыгъында къабаатлады.
Бу ракъамларны о Незарет-ревизия идаресининъ (НРИ-КРУ) тешкерювлери нетиджесине эсасланып бильдирди. Везирлер Диванынынъ ёлбашчысы бойле эсап кетире: «Эгер бу 10,2 миллиард 100 гривнялылыкъларгъа чевирильсе, бойле пара колемининъ агъырлыгъы 100 тоннаны тешкиль этеджек. Эгер о юзлерликлер бири-бирининъ устюне къоюлса, о «терекнинъ» юксеклиги Эйфель къуллесинден 7 кере юксек оладжакъ». Украинадаки хырсызлыкънынъ кенишлиги, иште, бойледир!
«Къолайсыз яткъан шейлер» «Нафтогаз»да…
2007 сенедеки укюмет фаалиетининъ тешкерювлери нетиджесинде «Укрзализница» (Демирёл), «Нафтогаз», «Энергоатом»да, комюр санайысынынъ ишханелеринде миллиардлыкъ бозукълыкълар олгъаны ачыкъланды.
- Бу хырсызлыкъларнынъ сойадлары бар, - деп беян этти Юлия Тимошенко. О, «Нафтогаз»даки мисильсиз суистималлар ичюн шахсий месулиетни Януковичнинъ укюметиндеки сабыкъ везир, регионджы Юрий Бойко чекмек кереклигине эмин. НРИ актларында косьтерильген малюматларгъа коре, 2006-сенесининъ сонъунда ве 2007-сенеси девамында Бойко ве онынъ муавини Ворониннинъ незаретлери астында олгъан «Нафтогаз»да 2,2 миллиард девлет парасы изсиз «ёкъ олды».
Баш везирнинъ фикири боюнджа, бу ал «Нафтогаз» миллий акционерлик компаниясынынъ банкрот олмасына ве дагъылмасына алып кельди. Янъы Везирлер Диваны буюк зорлукълар иле вазиетни тюзетти.
… демир ёлда ве ер астында алынмакъта эди
Эгер Алякъа ве Накълие Везирлиги акъ-къында айтаджакъ олсакъ, мында эки миллиарддан зияде гривня халкъ парасы хырсызланды. Бу везирликнинъ башы Николай Рудьковский эди, къайд эте Баш везир. Тамам о заманда, «Укрзализница» демирёлда ишлетильген вагонларгъа ве истисалгъа ёлланылгъан параларгъа кельгенде зарар коре башлады.
Якъарыкъ ве комюр санайысы боюнджа сабыкъ везир Сергей Тулуб да тенкъитке огърады. НРИнинъ тешкерювлерине коре, комюр саасында кечкен сене 2,4 миллиард гривня джоюлды. Тимошенконынъ фикири боюнджа, бу ал шахталардаки къазаларгъа ве онларнен комюрджилернинъ гъайып олмасына себеп олды.
Комюр истисалына кельгенде исе, - девам этти озь къабаатлавыны Ю, Тимошенко, - бу затен Регионлар фиркъасы саиплиги астындаки олгъан саа. Мындаки суистималлар миллиардларнен эсапланмакъта. Шахталар не ичюн къурулмай, не ичюн олар кечкен сене земаневийлештирильмеди, тамирленмедилер ве комюрджилер арасында не ичюн фаджиалы вакъиалар, къазалар девам этмекте, - деген суаллерге джеваплар да бунда. Чюнки шахталаргъа, комюр саасына паралар етип кельмей эдилер.
Хырсызлар параларны къайтарып олурлармы?
Юлия Тимошенко намуссыз мемурлар ве фиркъа эрбапларыны бу параларны къайтармагъа меджбур этмек кереклигине эмин. Чюнки бу 10,2 млрд. хырсызлангъан паранен Регионлар фиркъасынынъ укюмлиги нетиджесинде тургъунлыкъ алына кельген сааларны исляат этмек мумкюн.
«Комсомольская правда
в Украине», 2008 с., 20-июнь.
Фикирлер
Фикирлеринизи языныз