Къырымда не ола шу? Анъламакъ къыйын!
28 Июня 2008 | Миллий тасиль
Тасиль
Миллий мектеплеримизни къапаталар
Къач йылдан берли япкъан эмегимизни ёкъкъа чыкъармакъ, халкъымызнынъ энъ мукъаддес чизгиси олгъан тилимизни гъайып этмек ичюн адамнынъ акъылы етмейджек ишлер япалар.
Къарасувбазар районындаки Зуя къасабасында энди аман-аман 10 йылдан берли къырымджа окъутув мектеби чалыша эди. О мектеп Украина Держкомнацы тарафындан, сонъ исе Тюркие, эм де Ираннынъ Украинадаки эльчиси къолтутувынен тамирленди ве чешит техниканен теминленди. Бу сене де ТИКА тарафындан сермия айырылып, актовый, спорт заллары, ашхане къурмакъ козьде тутула эди. Лякин район девлет мемуриетининъ медениет болюгинде чалышкъан аркъадашлар, не ичюндир, миллий мектепни къапатып, оны рус мектебине къошмагъа ве ТИКА тарафындан айырыладжакъ парагъа бу мектепни тамир эттиреджек олалар.
Не ичюн бойле акъсызлыкъкъа ёл бериле? Бу бизим миллий мектеп энди I-II-III басамакълы мектеп севиесине котерильди. Энди къач кере 11-нджы сыныф талебелери мезун олдылар. Я биз къырым тилини рус тилли мектепте сакълап олурмызмы?..
Даа бир шашыладжакъ вазиет. 23-июньде Акъмесджит районындаки Юкъары-Асма (Верхнекурганное) коюнде гражданларнынъ джыйылышы (сход граждан) кечирильди. Шу койдеки мектепни къапатып, талебелерни машинанен Донское кой мектебине ташыйджакъ экенлер. Юкъары-Асма кой мектебини исе балалар багъчасы япаджакъ, учь койден кичкенелерни мында ташыйджакъ эмишлер. Я бу насыл сиясет?
Бу меркезий койде 600 джан, бу джумледен 100-ден зияде къырым адамы яшай. Мектеп коллективи яхшы. Директор Р. Кандымны урьмет этелер. 11-нджи сыныфны битиргенлерден баягъысы университетлерге кирелер. Бу мектеп те энди I-II басамакълы севиеге котерильди.
Донское мектебине авушылса, 1-4 сыныф талебелери саат 12-де дерслери биткен сонъ саат 15-ке къадар автобусны беклейджеклер. Чюнки юкъары сыныфлар да шу автобуснен къайтмакъ керек ола-джакълар.
Гражданларнынъ джыйылышында бир къадын бойле деди:
- Донское мектебине къышта мунтазам суретте автобус къатнамады. Эгер Юкъары-Асма мектебининъ бинасы реорганизация япылып, оны учь кой ичюн балалар багъчасына чевирильсе, насыл этип учь койден балаларны мында кетиреджек ве мындаки талебелерни Донское коюне алып барып-алып келеджеклер? Я бу меркезде эм мектеп, эм балалар багъчасы япылса олмаймы?
Бойлеликнен, топлангъан 79 къорантанынъ ана-бабалары бирагъыздан бу Юкъары-Асма мектебининъ къапалмасына къаршы чыкътылар. Тааджип этиледжек даа бир шей олса, о да шу мектепте чалышкъан оджаларнынъ ич бири ишсиз къаладжакъларыны биле турып, бир сёз айтмады.
Топлашувда район девлет мемуриетининъ чиновниклери ве ери кой шурасынынъ галавасы озьлерини пек муляйим косьтердилер. Чюнки олар невбетте оладжакъ сессияда бу мектепнинъ такъдири чезиледжегини яхшы билелер.
Бейе ИЛЬЯСОВА.
Фикирлер
Фикирлеринизи языныз