Бала къыйметли, тербиеси ондан да къыйметли
30 Июля 2008 | Миллий медениет
Бирлик ве муаббетлик укюм сюрген къоранта
Биз, Сакъ районыныъ Лесновка коюнде яшагъан къартлар, сыкъ-сыкъ бири-биримизге къатнап, башымыздан кечкен агъыр-енгиль куньлерни хатырлаймыз. Биз, яшы энди 70-80-ни кечкен эсли-башлылар, эр бир девирнинъ насыл олгъаныны акъылымыздан ич де чыкъармаймыз.
Мен 82 яшындам. Совет укюмети девиринде 34 йыл оджалыкъ яптым. Дженк иштиракчиси олгъаныма бакъмадан, нефакъа яшымда биле бир къач йыл балаларны тербиеледим. Къартларнынъ: «Къайда бирлик - анда тирилик» деген лафы бар. Биз бирлик олгъанымыз, ватан дие йылларнен курешкенимиз ичюн озь арзумызгъа ириштик. Шимди мукъаддес Ватанымыз топрагъында яшаймыз. Бугунь де миллий чизгилеримизни сакълап къалмакъ огърунда бирликнен курешмелимиз.
Кеченде бираз о якъ-бу якътан лаф этип келейим деп, Февзие достумнынъ эвине бардым. Эвинде ёкъ экен. Киеви Риза Велишаевнинъ мусафирченлиги себебинден баягъы вакъыт отурдым. Субетимиз чокъкъа сюрди. Онынъ намуслы инсан олгъаныны анъладым.
Ризанынъ бабасы Шевкет Велишаев 1939 сенеси Балыкълава районындаки Уркуста коюнде дюньягъа келе. Онынъ ана-бабасы пек тербиели, эмексевер ве далапкяр инсанлар олып, 1944 сенесининъ сюргюнлигинде Марийск виляетининъ Йошкар-Ола шеэрине тюшелер. Бир къач вакъыттан сонъ ОзьбекистаннынъЧырчыкъ шеэрине келип ерлешелер.
Оларнынъ учь къызы бир огълу ола. Эписи окъуп, зенаат саиби ола. Шевкет 40 йыл бир ерде арабаджылыкъ (водитель) эте. Тербие-тертибини, инсаниетлик хусусиетлерини сакълап, урьмет къазана. Даима озь халкъынен берабер яшай. Къырымгъа ёл ачылгъан сонъ, Сакъ районынынъ Асан-Аджи (Журавлёвка) коюне ерлеше. Огълу Риза Велишаев Лесновка коюнде эки къатлы дюльбер бир эв сатын ала. Адамларны чагъырып эв дуасы япа. Къонакълы юртлары олсун…
Бабасы Шевкет шимди 76 яшында. Яшагъан коюнде дуаларгъа бара. Тойлар олса, оны алып барыджылыкъкъа давет этелер. О бойле эйиликнинъ тертип-низам ве шенъ кечмеси ичюн арекет япа. Къорантасынен берабер ислям динимизни, бутюн урф-адетлеримизни кереги киби куте. Къадыны ве балалары муаббет олгъанлары ичюн оларны эр кес урьмет эте. Ш. Велишаевнинъ докъуз торуны бар. Бутюни илериде зенаат саиби олмакъ ичюн мектепте яхшы окъуй. Шевкетнинъ озю нумюневий хызмети ичюн бир сыра медаллер, къыйметли бахшышларнен такъдирленди.
Онынъ огълу Риза ве келини Весие эки огъул ве бир къыз бакъып тербиелей ве окъуталар. Балалары да ана-бабасы киби пек дикъкъатлы ве мусафирченлер. Бу къорантада даима бирлик ве муаббетлик укюм сюре. «Бала къыйметли, тербиеси ондан да къыйметли» дегенлери киби, олар озь эвлятларыны миллийлик рухунда тербиелемеге айрыджа дикъкъат этелер. О къоранта азаларына мен буюктен-буюк тешеккюр бильдирем. Ватанымызда даа чокъ йыллар раат яшап, шенъ-шерамет кунь кечирмелерини истейим. Оларнынъ туткъан ишлеринде даима Алла ярдымджы олсун.
Сайме БЕКИРОВА,
Сакъ р-ны, Лесновка кою.
Ресимде: Шевкет Велишаев той ачкъан вакъыты.
Фикирлер
Фикирлеринизи языныз