Медениетимиз илерилейми, аджеба?
30 Июля 2008 | Миллий медениет
Къырымгъа къайткъан сонъ халкъымыз эр саада гъайыпларымызны толдурмакъ ичюн чалышмагъа, алим ве мутехассысларымыз агъыр ве месулиетли ишни башладылар. Эбет, бу - келеджегимиз ичюн япыла!
Медениет иле огърашкъан эрбапларымыз озьлери агъыр алда булунып, баягъы иш япалар - музыка, санатымызны гъайрыдан тиклемеге тырышалар. Биз оларгъа самимий тешеккюримизни бильдиремиз.
Амма ашагъыдаки бу сёзлернинъ язылмасына бугуньки медениетимизнинъ «янъы кетишаты» меджбур эте.
Биз, яшлар, озь келеджегимизни тюшюне ве урф-адетлеримизнинъ бойле шекилли истикъбали бизни раатсызлай.
Менимдже, медениет тек тиль иле ифаде этильмей. Онынъ эм озь фельсефеси, эм де озь тарихий темели бардыр. Энъ-эвеля онъа коре инкишаф этильмели. Мисаль ичюн, музыкамызны алсакъ, базы бирилери башкъаларнынъ йырларыны къырым тилине чевирип, оларны «бизим тюркюлеримиз» киби бизге нумайыш этелер. Булар сонъки заманларда пейда олгъан «ёкъасан»лар, «танго»лар, «молдавско-болгарский», «казанские напевы», «Тарканлыкъ»лар, «чыплакъ»лар тюркюлери ве иляхре. Оларнынъ сонъу медений джеэттен ёкъ олмакъ дегильми?
Бизим асылымыз зенгинден-зенгиндир. Халкъымызнынъ мустакъиль ве озюне хас къыйметликлери етерлик. Олар Къырым ве халкъымызнынъ ерли хусусиетлери ве Ислям динининъ шартлары эсасында асырлар девамында шекилленип кельгендир. Амма базы бугуньки эрбаплар (оларнынъ араларында яшлар да бар), башкъаларгъа бакъып, оларнынъ медениет шекилини олгъаны киби кочюрип алалар. Менимдже, биз ичюн бу келишмеген бир кетишат.
Биз озь темелимизге эсасланып, земаневий медениетимизни инкишаф этмек керекмиз. Бу муим меселеде лякъайд олмакъ мумкюн дегиль! Бу мевзуда окъуйыджылар, яшдашларым озь фикирлерини бильдиргенлерини беклейим.
Февзи АМЗА,
«BiZiM QIRIM» Халкъара джемаат тешкилятынынъ тарафдары.
Фикирлер
Фикирлеринизи языныз