Языджылар миллий кенъешине «Къырымтатар языджылары бирлиги» статусы берильди
30 Июля 2008 | Миллий медениет
Бу мустакъиллик оларгъа тилимизнинъ, эдебиятымызнынъ инкишафы устюнде даа да зияде чалышмагъа рух бере.
21-нджи июль куню И.Гаспринский адына миллий китапханеде къырымтатар языджыларынынъ топлашувы олып кечти.
Кунь тертибинде учь меселе бакъылды:
1. Янъы тешкиль олунгъан Къырымтатар языджылары бирлигининъ иджадий тешкилят оларакъ статусы бельгиленгени акъкъында;
2. Къырымтатар языджылары бирлигини ресмийлештирюв меселеси;
3. 2008 сенеси къырымтатар языджыларынынъ китапларыны нешир этюв планы акъкъында.
Топлашувны шаир, Къырымтатар языджылары кенъешининъ реиси Шакир Селим алып барды.
Топлашувнынъ башында кеченлерде вефат эткен языджы Ибраим Пашининъ рухуна дуа окъулды. Сонъра биринджи меселе боюнджа Шакир Селим Риза Фазылгъа сёз берди. О, чыкъышында Къырымтатар языджылары кенъешининъ янъы статусыны бельгилемек ичюн бир йылдан зияде иш алып барылгъаны ве шу вакъыт ичинде нелер япылгъаны акъкъында къыскъадан айтты эм де Къырым Везирлер Шурасы янындаки Эксперт комиссиясынынъ реиси, Везирлер Шурасы реисининъ муавини Т.У Умрихина имзалагъан къарарны окъуп эшиттирди. Тешкиляткъа «Къырымтатар языджылары бирлиги» иджадий тешкиляты статусы берильгенинен языджыларны хайырлады.
Шакир Селим «Къырымтатар языджылары бирлиги» иджадий тешкиляты статусыны алмакъ ичюн Риза Фазыл ве Дилявер Осман баягъы иш япкъанларыны айтты ве реис оларакъ Риза Фазыл, кятип оларакъ Дилявер Османнынъ намзетлери бир даа тасдикълансын деп, меселени рейге къойды.
Языджылар Билял Мамбет, Рустем Муедин, Урие Эдемова, Аблязиз Велиев ве дигерлерининъ чыкъышларындан ве музакереден сонъ, топлашувда иштирак эткен языджылар ачыкъ рей берювнен намзетлерге къолтуттылар.
Чыкъышлар девамында языджылар Шакир Селим «Къырымтатар языджылары бирлиги»нинъ фахрий реиси олсун, деген фикирни бильдирдилер. Бу фикирге де бир къалмай къолтутылды.
Риза Фазыл тешкилятнынъ президиумына 9, тефтиш комиссиясына 3 языджы кирсетильгенини айтты.
Тедбирде Миллий Меджлис реисининъ муавини, Къырым Юкъары Шурасы Миллетлерара мунасебетлер боюнджа Даимий комиссиясынынъ реиси Ремзи Ильяс да иштирак этти. Ана тили огърунда куреш программасыны девам этмекни ве Къырымнынъ чешит районларында ана тилимизни тешвикъат япмакъны теклиф этти. Транспортнен теминлемеге ярдым этеджегини бильдирди.
Топлашувнынъ сонъунда бу сене план боюнджа дердж этиле-джек китаплар акъкъында айтылды ве Ремзи Ильяснынъ иштирагинден файдаланып, къырымтатар бедиий эсерлерининъ неширине айырылгъан пара тек бедиий эдебий неширлерге берильмек, тарихий, ильмий китаплар бунъа къарыштырылмамакъ лязим олгъаны къайд этильди. Чюнки шимди язы-джылар тилимизнинъ, эдебиятымызнынъ инкишафы устюнде чалышалар.
Наджие АМЕТОВА.
Фикирлер
Фикирлеринизи языныз