Инсанлар чешит тюрлю ола, чюнки табиат бизни ойле яраткъан. Биз ич де бири-биримизге ошамаймыз. Мен, эльбетте, бет сыманы, ички дюньяны, къабилиетлерни назарда тутам.
Кеченлерде Петро Григоренкогъа багъышлангъан весикъалы фильмни корьдим. Мен бу инсан ве онынъ такъдиринен чокътан меракълана эдим. Бу фильмни Миллий АТР- Атлант телекосьтерюв каналында чалышкъан Севиль Алядинова азырлагъан экен. Мерагъымызнынъ бир олгъаны бизни якъынлаштырды. Субетимизде онынъ рус ве украин тиллериндеки косьтерювлер устюнде чалышкъаныны, макъсады исе ана тилимизни мукеммель огренип, сербест лаф этип, догъмуш тилимизде косьтерювлер азырламакъ олгъаныны анъладым.
Севиль Озьбекистанда Бекабад шеэринде догъып оськен. Онынъ бабасы миллий арекетте иштирак эткен. О, къызыны топлашувларгъа алып бара экен. Бу корюшювлер эльбетте де, изсиз къалма-гъан эм де Севильде миллий рух уянткъан.
Севильни та яшлыкътан шиириет меркъландыргъан. Шу себептен о А.Пушкин, Бекир Чобан-заде, Эшреф Шемьи-заденинъ шиирлерини яхшы эзберлей. Буларнынъ эписи онъа тесир эте ве о 14 яшында олгъанда шиир яза. Онынъ язгъан шиири рус тилинде олгъанына бакъмадан, ана-Ватанымыз — Къырым акъкъында эди. «Бекабад ишчиси» адлы шеэр газетинде онынъ ильк шиирлери дердж олуна. Шу девирде о музыка мектебини фортепияно классы боюнджа аля ишаретнен битирди. 1992 сенеси 11-нджи сыныфны яхшы ишаретлернен битирди ве шу сенеси Ташкент девлет университетининъ журналистика шубесине окъумагъа кире. Ана-бабасы исе 1991 сенеси Къырымгъа коче. Севиль анда къала ве окъувыны девам эте. О, студентлик йыллары ве ильк эмек фаалиети акъкъында бойле деди:
—Мен биринджи курста окъу-гъанда бизге шимди «Къырым» газетининъ редакторы олып чалышкъан Бекир Мамут дерс бере эди. Онынъ лекцияларыны ич къалдырмай, эписини динъледим. О ишини бильген, зенаатыны севген, халкъына садыкъ инсанлардан биридир.
Мен о девирде олгъан бутюн тедбирлерде иштирак эттим ве язмагъа тырыштым. Къалемим эп пишкинлешти. Кендимде талапкярлыкъ киби чизгини тербиелемеге наиль олдым. Курсдашларымнен «Журналист» адлы диварий газет чыкъардыкъ. Биз анда ма-къалелер ве шиирлер яза эдик. Шу вакъытта бир поэма биле язгъан эдим. Чокъ языкълар олсун ки, ана тилимизде язып оламайым, лякин иджадымны озь ана тилимде мытлакъа девам эттиририм деген умютнен яшайым. Айны вакъытта ильмий ишнен огърашам. Ильмий реберим Ф.П Нестеренко манъа чокъ ярдым эте. Телевидение, радио, газет ве журналларда хал-къымызнынъ къайтув джерьяны ве оларнынъ ерлешюв проблемлери насыл усулларнен чезильгенини айдынлатув ролю неден ибарет киби деген халкъ такъдиринен багълы мевзу устюнде чалышам.
1996 сенесинден Къырым девлет каналында (ГТРК) журналист оларакъ эмек фаалиетимни башладым. Ишимни пек севем, эр кунюм иджатнен багълы.
Айткъанына коре Севиль Къырымгъа кочькен сонъ, окъувыны гъыябий девам эткен. Девлет телеканалында чалышкъан вакътында репортаж ве левхаларны рус ве украин тиллеринде азырлап, эфирге чыкъаргъан. Янъылыкълар да азырлагъан.
2001 сенесинден Шевкет Меметов реберлигинде чалышмагъа башлады ве янъылыкълар, муэллифлик программасыны, украин тилинде «Повернення» («Авдет») эшиттирювлерини азырлады. АТР каналы дюнья юзюни корьген сонъ Севиль Алядинова лейиха боюн-джа миллий арекет ветеранлары акъкъында «Вакъытнен сыналгъан инсанлар» киби весикъалы фильмлер яратты, «Куреш» адлы поэма язды.
Севиль шу сене Шевченко адына Киев девлет университети янындаки журналистика институтынынъ аспиранты олмагъа наиль олды. Чокъ кечмеден укъукъкъорчалайыджы Петро Григоренко акъкъында да фильм яратты. О бу ишни япа-джакъта деерлик Киевдеки бутюн китапханелерни араштырып чыкъты ве пек аз малюмат топлады. Сонъра бу фильмни яратмагъа онъа тарихчы Гульнара Бекирова ярдым этти. Севиль Ялтада кечирильген телекинофильмлер кинофестивалинде иштирак этти. О «Кунешли» адлы фильми ичюн биринджи ерни къазанды. Тохтар Османовнынъ 100 йыллыгъына да ба-гъышлап фильм яратты. Бу адамнынъ бабасы Ялтада Чеховнынъ эвинде чокъ йыллар девамында багъчеван олып чалышкъан. Бизим халкъ сюргюн олунгъан сонъ да Чеховнынъ къыз къардашы Османовлар аилесинен багъ туткъан.
Миллий куреште иштирак эткен ватангъа, халкъына садыкъ олгъан инсанлар Иззет Хаиров, Айше Сеитмуратова, Гомер Баев, Идрис Асанин акъкъында весикъалы фильмлер яратты. О фильм яраткъанда инсанлардаки адалетперверлик, саф виджданлыкъ, ватанперверлик чизгилерине зияде дикъкъат айыра ве бойле инсанлар акъкъында фильмлер яратмагъа даима азыр.
Сейяре МЕДЖИТОВА.
Ресимде: Севиль Алядинова.
Фикирлер
Фикирлеринизи языныз