14 –15-апрель куньлери Киевде Украина языджылары миллий бирлигининъ бутюн виляетлердеки болюклер реислерининъ мушавереси олып кечкен эди. Мушавереде Къырымтатар языджылары кенъешининъ реиси Риза Фазыл ве Украина языджылары миллий бирлиги Къырым тешкилятынынъ реиси Владимир Бушняк иштирак эттилер.
24-апрельде И.Гаспринский адына миллий китапханеде олып кечкен Къырымтатар языджылары кенъешининъ топлашувында бир сыра ички меселелер бакъылгъан сонъ, Къырымтатар язы-джылары кенъешининъ реиси Риза Фазыл Киевде олып кечкен мушавереде бакъылгъан меселелер акъкъында эсабат берди ве, джумледен, бойле деди:
—Мушавере апрель 14-те Киевнинъ дживарында ерлешкен «Ирпень» иджат эвинде кечирильди. Мушаверени Украина языджылар миллий бирлигининъ реиси, Украина халкъ депутаты Владимир Яворивский алып барды. Мушавереде эсасен майыс айында Днепропетровск шеэринде улу Украин шаири Тарас Шевченконынъ хатырасына багъышлангъан ве аньанеге чевирильген эдебият ве санат фестивалинен багълы меселелер бакъылды. Эльбетте, бу фестиваль кениш суретте отькерильмеси козьде тутула ве шунынъ ичюн чокъ суаллер ве теклифлер ортагъа къоюлды.
Бунынънен берабер Ялта, Коктебельде ве дигер ерлердеки иджат эвлерине ёлланмалар алув ве бу йылки ёлланмаларнынъ фиятлары, языджыларнынъ «Литературна Украина» газетине абуне олмалары акъкъында, яш иджаткярларнен чалышув, ерли акимиет органларындан керекли масрафлар ичюн пара талап этюв, языджыларнынъ эдебий аяты ве эдебиятнен багълы чешит тедбирлерде фааль иштирак этмелери хусусында меселелер бакъылды.
Украина языджылар миллий бирлигининъ виляет болюклерининъ реислери котерильген меселелер боюнджа фикир пайлашкъанда, мушавере къызгъын мунакъаша шеклини алды. Мунакъашада мен ве Украина языджылары миллий бирлиги Къырым тешкилятынынъ реиси Владимир Бушняк да лафкъа къошулып, къыскъадан озь тешкилятларымыз акъкъында малюмат бердик.
Мушавереде, джумледен, языджылар ичюн азалыкъ тёлев (членские взносы) 35 гривня оладжагъы бильдирильди. Коктебельдеки я да Ялтадаки иджат эвлерине раатланмагъа бармакъ меселеси айтылды.
Эртеси куню Украина языджылары миллий бирлигининъ башта Президиум топлашувы олды, сонъ бутюн региональ реислернинъ иштиракинен Украина языджылары миллий бирлиги идаресининъ топлашувы кечирильди. Бу топлашувда Украина языджылары миллий бирлиги насыл чалышкъаны, насыл ишлер алып барылгъаны ве умумен Язы-джылар бирлиги огюнде тургъан меселелер хусусында лаф юрсетильди. Умумен эм мушавере, эм де идаре топлашувы ерли реислер ичюн чокъ меракълы ве файдалы олды.
Топлашувда белли языджы Урие Эдемованы догъгъан куню мунасебетинен языджылар адындан Риза Фазыл, «Ильхам» эдебий клубы азалары адындан Сейран Сулейман, китапхане хадимлери адындан Гульнара Ягъя, Булгъанакъ миллий мектеби оджалары ве талебелери адындан Фатиме оджа Сайфулаева хайырладылар ве гульдестелер багъышладылар.
Биз ярдым этмеге даима азырмыз
Бир къач йыл эвельси рахметли шаиримиз Юнус Къандым «Ильхам» эдебий клубыны тешкиль эткен эди. Онынъ бу ишини шаиримизнинъ вефатындан сонъ шегирти С.Сулейман ве белли шаиримиз Ш.Али девам этмектелер. Шу куню «Ильхам»нынъ да топлашувы бар эди. Язы-джы ве шаирлеримиз озь меселелерини бакъкъан сонъ авескяр иджаткярларнынъ риджасынен оларнынъ топлашувында да иштирак эттилер.
Топлашувда Эшреф Шемьи-заденинъ 100 йыллыгъына багъышлангъан чыкъышлар олды эм де «Ильхам» эдебий клубы азаларынынъ «Ильхам» гульдестеси» джыйынтыгъынынъ такъдими кечирильди.
Шерьян Али Э.Шемьи-заденинъ аяты ве фаалиети акъкъында къыскъадан айтты, сонъра авескяр шаирлер Эльвина Велишаева, Урие Къадырова, Севиль Саранаева, Адиль Муртазаев шаир Э.Шемьи-заденинъ шиирлерини ве озьлери Эшреф агъанынъ хатырасына багъышлап язгъан шиирлерини окъудылар.
Эмине Усеинова исе озь шиирини окъу-гъан сонъ Э.Шемьи-заденинъ «Аслыхан» поэмасына багъышлап, яраткъан фильмини нумайыш этти.
Яш авескяр иджаткярлар ве белли шаир эм де языджыларнынъ бераберликте отькерген топлашувы гъает джанлы кечти. Языджылардан Аблязиз Велиев, Валерий Басыров, Айше Кокиева сёзге чыкъты, «Йылдыз» меджмуасынынъ эдебий хадими Ленияра Селимова «Ильхам» гульдестеси» акъкъында озь фикирлерини бильдирди ве джыйынтыкъта эсасен шиирий эсерлер ер алгъаныны, несир пек аз олгъаныны къайд этти.
Топлашувгъа кельген языджылар иджатнен эсасен къадын-къызлар огърашкъанына, йигитлеримизнинъ аз олгъанына дикъкъат айырдылар. Языджы Урие Эдемова бу топлашув нетиджесинде белли, теджрибели языджы ве шаирлернен яш иджаткярлар арасында къавий йип багълангъаныны айтты ве: «Биз сизге ярдым этмеге даима азырмыз», — деди. Топлашув яш иджаткярлар азырлагъан къаве софрасы башында самимий муитте девам этти.
Наджие АМЕТОВА.
Хайырлы яшлар!
Белли языджы, бир сыра икяе, повесть ве романнынъ муэллифи, чокъ йыллар девамында нешриятларда къырымтатар эдебияты редакциясынынъ баш муаррири олып чалышкъан Урие ханым ЭДЕМОВА 23-апрельде догъгъан кунюни къайд этти. Оны бу мунасебет иле джан-юректен хайырлаймыз. Языджыларымыз, зиялыларымыз сырасында озюне хас корюмли ве эмиетли ерни туткъан озьгюн эдибемизге къавий сагълыкъ, узун омюр, бахт-сеадет, иджадий фаалиетинде мувафакъиет тилеймиз! Урие ханымдан янъы-янъы эсерлер беклеймиз. Алла онъа даима ильхам багъышласын!
«Къырым» муарриети.
Фикирлер
Фикирлеринизи языныз