В. Ющенкогъа бакъкъанда Л. Кучма къырымтатарларгъа чокъча дикъкъат айыра эди
27 Авг 2008 | Миллий арекет
Бу акъта Миллий Меджлис реиси Мустафа Джемилев “Тиждень” адлы украин меджмуасына бильдирди.
“2004 сенеси олгъан сайлавларда Къырымда Ющенкогъа къолтуткъанларнынъ 14 файызындан 12 файызыны къырымтатарлар тешкиль эттилер. Бу вакъыт ичинде о тек бир кере келип кетти. Мен бир бучукъ саат бутюн проблемлер: топракъ, къуруджылыкъ, тасиль ве башкъалар акъ-къында анълаттым. О айтты ки, биз теслим эткен 14 меселеден 4-5 меселесини о бир афта ичинде, къалгъанларыны исе (хусусан топракъ проблеми) Хавфсызлыкъ Кенъешини топлап, бакъаджагъыны ве чезеджегини айтты. Бутюн булар тек сёзде къалды…
Билесинъизми, биз Кучмагъа насыл мунасебет косьтерсек де, Меджлиснинъ легаллештирюви (1999 сенеси 17-майыста Президент янында Къырымтатар халкъы векиллерининъ Кенъешини мейдангъа кетирюв) - онынъ хызметидир. О даимий суретте Къырымны зиярет эте, Меджлисни, мухтариет реберлерини топлай, проблемлер акъкъында сораштыра, авалелер бере эди.
Бу авалелер беджерильмегени, оларнынъ беджерильмесини кимсе незарет этмегени - о башкъа лаф. Лякин девлет башы бизге келип кеткени - бу маневий джеэттен буюк къолтутув эди”, - деди М.Джемилев.
Бунынънен берабер о Меджлис легаль тешкилят олгъаныны къайд этти.
“Бизге Меджлис къануний олсун деп, оны джемаат тешкиляты оларакъ ресмийлештирмек керек, деп айталар. Амма о джемаат тешкиляты дегиль! Бу векялетли орган, оны танымакъ я да танымамакъ мумкюн. Меджлисни Украина къанунджылыкъ муитине кирсетмек ичюн къанун керек. Биз та 1999 сенеси Украинанынъ къырымтатар халкъы статусы акъкъында къанун лейихасыны азырлагъан эдик. Анда Меджлис акъкъында сёз юрсетиле. Лякин бу къанун лейихасы сессияда бакъылмады, бакъылса биле, рейлернинъ етерлик сайысыны топламайджакъ…
1999 сенеси сюргюнликнинъ 55 йыллыгъына багъышлангъан наразылыкъ акцияларындан сонъ, сабыкъ президент Леонид Кучма Киевде Меджлиснинъ бутюн теркибинен корюшти. Бу корюшювде Леонид Грач ёлбашчылыгъында мухтариетнинъ бутюн реберлиги иштирак этти. Кучма, Меджлисни Украина къануний муитине кирсетмек проблеми бар, деп айтты. Л.Грач: Украина Анаясасында “меджлис” сёзю олмагъаны себебинден оны къануний япмакъ мумкюн дегиль, деди. Кучма бойле айтты: “Анаясада чокъ шей ёкътыр, омюрде исе бар. Бу себептен барынъыз ве тюшюнинъиз”. Сонъ биз берабер Къырымтатар халкъы векиллерининъ Кенъешини мейдангъа кетирдик, о Меджлистир”, - деп анълатты М.Джемилев.
Фикирлер
Фикирлеринизи языныз