Адий булгъар къадыны
30 Авг 2008 | Дигер
Сагълыгъымыз - байлыгъымыз!
Ванганынъ сагълыкъ энциклопедиясындан
Навезинлик (Аритмия). Ярым кило лимонны эренделемек, онъа 20 дане къайсы чигердегини эзип къошмакъ ве ярым кило балнен къарыштырып, саба ве акъшам ашамаздан эвель бирер аш къашыкъ ашамакъ керек.
Богъма (Астма). Урлукъ ичюн къалдырылгъан 40 дане согъан устюне къайнагъан сув тёкип, олар йымшагъандже беклемек, сонъ исе сувуны тёкип, ярым литр зейтюн (я да къабакъ) ягъы ичинде паста киби олгъандже пиширмек керек. Саба ве акъшам аштан 5-10 дакъкъа эвель бир аш къашыкъ ашамакъ керек.
Юкъусызлыкъ. Ястыкъны тазе къурутылгъан пичен я да шербетчи оту (хмель)нен толдурып, онынъ устюнде ятмалы. Эгер ятаджакъта бир аш къашыкъ бал кьапсанъыз, о ястыкънынъ файдасы даа зияде олур.
Чокъ раатсызлангъан ве юкъусыз баланы исе, Вангананъ айткъанына коре, саба осюмликлерде пейда олгъан чыкънен явлукъны сылатып сарып, ярым - бир саат (явлукъ къуругъандже) тутмалы. Чюнки осюмликлер саба эрте чокъ шифалы мадделерни чыкъара экен.
Кокрек агърысы. Маянен басылгъан хамыргъа 100 г сирке, 100 г куньайлан ягъы къошып, къарыштырып, компресс япмалы. Агъыргъан ерге къоюлгъан бойле компресс акъджигер сувукъланувындан пейда олгъан агърыны токътатыр.
Аякъ агърысы. Буюк эмалленген савут ичинде бир топ къызыл-беяз къаба ёнджа (люцерна) къайнатынъыз. Сувугъан сонъ сюзип, ичине бир аш къашыкъ керосин къошунъыз. 3-4 кунь эр акъшам бу къарышманынъ бувынен аякъларынъызны пишкеленъиз.
Омуз агърысы. Бир юнь басма парчасыны бензинге батырып, агъыргъан ерге къоюнъыз, устюне бакъыр савут (тарелка) къапатынъыз.
Бу джерьянны учь кунь арды-сыра текрарланъыз.
Бель агърысы. Эски кираметни уфатмакъ, чильтерден кечирмек, ичине учь йымырта беязы, 1 г эзильген киев оту (тимьян), бир фильджан ракъы къошмакъ ве къарышманы кетен (лён) чулгъа сюртерек, агъыргъан ерге къойып, бутюн гедже тутмалы.
Сырт (аркъа) агърысы. Колеми бир метр олгъан беяз темиз басмагъа 100 г силя (тюфек) ягъы сюртмек ве учь кунь сыдыргъа аркъагъа къоймакъ керек.
Юксек къан басымы. Бир стакангъа бир аш къашыкъ мысырбогъай уну къойып, толгъандже сыджакъ сув тёкмели. Бутюн гедже тутып, тюбюни чайкъамайып, арынчыкъ ерини ичмели. Я да эр кунь аштан эвель 2-3 аш кьашыкъ къабакъ ягъы ичмек керек.
Сач тёкюлюв. Сачынъызны ювгъан сонъ, оны чырмавыкъ оту пиширильген сувнен чайкъанъыз. Башынъызны ювгъанда, сабун ерине тиббият балчыгъыны къулланынъыз. Ондан сонъ бир айгъадже башынъызгъа догъралгъан лимон парчачыкъларыны сюртюнъиз.
Мидеянгъы (Гастрит). Аштан эвель акъ тал (верба) япракъларындан азырлангъан бир фильджан чай, ондан сонъ бир стакан тазе сют ичмели.
Шекердучар (Диабет). Бу хасталькъ буюклерде янъы башлангъан олса, бурюльген япракъларындан азырлангъан шингенликни ичмек файдалыдыр.
Оть пускасынынъ (желчь) зарарланувы. Эр кунь саба тургъанда, эки армут ашамакь, кийик армутлардан шекерсиз азырлангъан хашаф ичмек лязим. Эгер аштан сонъ отюнъиз пек агъырса, ярым лимоннынъ шырасына ярым чай къашыкъ аш тузу къошып, къарыштырып ичинъиз.
Оть пускасында таш олса,оны ярым литр къабакъ ягъы ве яхшы сюзюльген лимон шырасанен тедавийлемек мумкюн. Ашагъанынъздан 6 саат кечкен сонъ, 4 аш къашыкъ къабакъ ягъы, артындан 1 аш къашыкъ лимон шырасы ичмели. Эр 15 дакъкъада бу джерьянны текрарламалы. Аз-бучукъ
кекирик тутса, ондан сакъынманъыз.
Миде (желудок) агърысы. Эгер о синъирленювден олса, бир стакан сувгъа бир аш къашыкъ анис (алма джьнысы) ракъысы къойып, къарыштырынъыз, ичинъиз. 15 дакъкъадан сонъ бир аш къашыкъ зейтюн ягъы ичинъиз.
Оксюрик Тютюн ичкенлер ичюн Ванга бойле илядж тевсие эте: эбен комечи (мальва)нинъ бир къач тамырчыгъыны ярым литр сютте 10-15 дакъкъа къайнатып, куньде бир къач кере ичмели.
Сувукъланып, къатты оксюргенде исе бойле илядж ичмели: ярым литр сувгъа дёрт джевиз (къабугъынен), бир аш къашыкъ къавал агъачынынъ чечегини ве шу къадар да бал къойып, къайнатынъыз. Сувутылып, сюзюльген шингенликни бир аш къашыгъынен кунъде учь кере истимал этмели.
Кеченлерде Акъмесджит шеэрининъ Карл Маркс сокъагъындан
кеткенде «Лучшие рецепты ясновидящей ВАНГИ» адлы бир рисалеге козюм тюшти ве оны алып окъудым. Эбет, онда бизге белли шейлер де бар, Амма,биз эр вакъыттаки киби, бойле шейлерге къулакъ асмагъанымыз ичюн олардан озь вакъытында файдаланмагъа ашыкъмаймыз.
62 саифелик бу китапчыкъта баягъы; бир хасталыкъларны тедавийлемек ичюн иляджлар косьтериле. Биз оларнынъ тек бир къысмыны яздыкъ.. Китапчыкънынъ «Целебные растения Ванги» денильген болюгинде бурюльген (ежевика), къуш къонмаз (облепиха),
джилек (клубника), ,юзюм, къурт оту (лимонник китайский), джылап (овёс), сомлаз (омела), ювшанъ (полынь), еране (герань), когем (тёрн), тюзтабан (мать-мачеха), киев оту (тимьян), къампа (лопух) ве башкъа шифалы отларнынъ насыл хасталыкъларгъа дерман олгъаны тафсилятлы суретте беян олуна. Бу китапчыкъ бу сене Москвадаки «Рипол классик» компаниясы тарафындан нешир этильген (ул.Большая Анроньевская, 23).
Не бермеген АЛЛА. Бельки ватандашларымыз файдаланыр ве дертлерине шифа тапарлар, деген ниеткен оны газетте басмагъа къарар бердик.
Азырлагъан Р. АХТЕМ
Фикирлер
Фикирлеринизи языныз