Къаршылыкъ арекетлер эксильмей
30 Апр 2008 | Миллий Меджлис
23-апрельде Къарасувбазар региональ меджлисининъ невбеттеки топлашувы олып кечти. Кунь тертибинде джумледен бойле меселелер бакъылды:
18-майыс – матем кунюмизге тедарик корьмек, кой, къасаба, шеэр шура реислеринден автобус сорамакъ, бензин, байракъ, шиарларны азырламакъ киби меселелер музакере этильди.
Шеэр истираат багъчасында инкъиляпкъа къадар къабирлери олгъан Осман девлетли азизи, Умер девлетли азизи, Сельви девлетли азизининъ хатырасына азырлангъан ташны къабирлери силинип кеткен ерге къоймакъ меселеси бакъылды.
— Бу меселе 2006 сенеси башланды, шеэр шурасына ариза берильди, шеэр депутатлары бу меселени учь сессияда бакъып ред эттилер, дёртюнджи кере атта кунь тертибине кирсетмедилер.
Шу себептен азырлангъан ташны ерине къоймакъ кереклигини сёйлеген аркъадашларнынъ теклифине къаршылыкъ косьтерильди. Меджлис реиси М. Асаба таш къоймакъны Миллий Меджлис ве Муфтиятнен анълашмакъ керек, — деди.
Базы аркъадашлар бу багъчада азизлернинъ мезары олгъанына шубелендилер. Бу депутатларымыз «Къырым» ве «Голос Крыма» газетлерини окъумагъанлары белли олды. Муфти Эмирали Аблаевнинъ бир чыкъышында: «Эр бир диний меселени чезмек ичюн муфтияттан сорамакъ шарт дегиль», — деген сёзлерини эшитмеген аркъадашлар бар экен, я, районымызда баш имам бар, район ве шеэр джемиети бар, бундан башкъа ерли халкъ, муминлер бар. Бойле меселелер еринде чезильмек керек дегильми?!
«Красный октябрь» сокъагъыны Абдурешид Медиев адына чевирмек меселеси музакере этильди. Бу меселе де шеэр шурасынынъ сессиясында къатиен ред этильди. Буны чезмек ичюн меджлис азалары атта бир теклифнен чыкъмадылар.
Халкъымыз чокъ яшагъан шеэрде Къарасувбазарда айры шеэр меджлиси олмагъаны себебинден чокъ меселелерни чезмеге имкян олмай.
Певат АДЖИРЕДИНОВ,
озь мухбиримиз.
Фикирлер
Фикирлеринизи языныз