Серги залларында
Август 11-де Къырым этнография музейинде Къырымтатар санат музейи ве Къырым медениет ве санат везирлиги ишбирлигинде Сеитмемет агъа, Рустем бей ве Эдие ханым Якъубовларнынъ шахсий сергиси тешкилятландырылды.
Сергиде 100-ге якъын экспонат нумайыш этильди. Чешит-тюрлю кирамет ишлери: савутлар, кучюк эйкеллер, чыракълар, эв донатма эшьялары бири-биринден меракълылар.
Сеитмемет Якъубовнынъ «Ер сейяреси», «Манзаралы бардакълар такъымы», «Лампат», «Сахра гемилери» киби учь къысымдан ибарет ишлери, Рустем Якъубовнынъ: «Кактуслар», «Къыз башы» ве дигер балчыкътан япылгъан шейлери, Эдие Якъубованынъ «Манзаралы савутлар», «Чешме» киби бир сыра ишлери сейирджилернинъ дикъкъатыны озюне зияде джельп эттилер.
Рустем Якъубов иджадий ишнен огърашмакънен бир сырада амелий -манзаралы санатымызнынъ гъайрыдан тикленмесине салмакълы иссе къошып кельмекте. О «Глиняные узоры» адлы мектеп-студиясына мудирлик япа. Къырым муэндислик педагогика университетининъ Амелий-манзаралы санат болюгинде оджа олып чалыша.
Бу санаткярлар аилеси озь япкъан ишлеринен тек Къырымда дегиль, бир сыра мемлекетлерде эйкельтырашлыкъ ве кирамет ишлеринен танылдылар. Оларнынъ сергиси 5-нджи сентябрьге къадар девам этеджек. Буюрынъыз!.
Гульнара БЕКИРОВА,
ТМУ къырымтатар тили ве эдебияты болюгининъ
студенти.
Фикирлер
Фикирлеринизи языныз