Меним азиз къырым миллетим!
30 Авг 2008 | Миллий тарих
Сесленюв
“Къырым” газетининъ 23-августта чыкъкъан 65(1233) санында басылгъан “Карачай” джемаат фонду президенти Хасан Халкёчнинъ Асыл халкълар халкъара симпозиумында япкъан марузасыны окъугъанымнен, 9-август куню кечирильген тедбир козь огюмде джанланды…
Хасан Халкёч: “… Бу асыл халкъны сиз татарлар, деп адландырасынъыз. Амма онынъ этник ады “къырымлы” (”крымец”)”, - деп чокъкъа бармайып, екюн чекти. Надир Бекир исе онъа къаба шекильде итираз бильдирип: “Бу янълыш ибаре, чюнки къырымлыгъа Къырымда яшагъан къырым руслары, къырым урумлары, къырым эрменилери ве иляхре халкълар кирелер - деди. -Бизим миллетимиз арасында бойле фикирлер юрсеткен инсанлар бар, лякин бахткъа къаршы олар азлыкъны тешкиль этелер”.
Энъ меракълысы шунда ки, “къырымлар” ибареси факъат къырым миллетини дегиль де, Къырымда яшагъан бутюн халкъларны къаврап ала эмиш. Амма украинлер, испанлар, къытайлар, афгъанлар, фарслар, эстонлар ве иляхрелер озь девлетлерининъ миллетлери олгъанларыны ифаде эте экенлер. Парадокс!
Не демек олсун ки, Надир бей ве онынъ тарафдарлары бойле мантыкъсыз къарама-къаршылыкъларны айтып, озьлерини маскъара этелер!
Урьметли ханым ве эфендилер! Тюшюн де бакъынъыз, къырым татарлары (крымские татары) адлы миллет ер юзюнде ёкътыр. Къырым миллетининъ ватаны - Къырым, татар миллетининъ ватаны - Татаристан. Весселям! Бу меселеге баш ёруп отурмакънынъ заруриети де ёкътыр, чюнки оны энди 10 яшындаки балалар да анъладылар…
Амма халкъ озь фикирини бильдирмеге ашыкъмай. Базылар шу инат татарджыларнен талашмагъа истемейлер, дигерлерининъ бунъа вакъыты ёкътыр, даа бирлери бу меселеге битараф бакъалар. Чюнки миллетимизнинъ асыл ады меселесине эмиет биле бермейлер, эр кес озь ишинен мешгъуль…
Адымыз меселесини бельгилемек, асыл къырым адымызны тиклемек ичюн келеджек несилимиз чекишеджегини тасавур биле этмейлер.
Бу эмиетсизликтен файдалангъан, Къырымда яшагъан 133 тюрлю миллетнинъ бириси биз - къырымтатарлармыз дегенлер, озь арзуларына иришмек ичюн арекет этелер…
Меним азиз къырым миллетим! Адымыз меселесине лякъайд олмайыкъ, онъа джиддийликнен янашып, V Къурултайымыз сессияларындан бирининъ кунь тертибине къойдурып, бу меселени мусбет чездирип, миллетимизнинъ асыл къырым адыны бельгилейик! Миллий арекетимизнинъ экинджи басама-гъына бирликнен азыр олайыкъ!
Абилькерим ВЕЛИЛЯ,
Сабла кою.
Фикирлер
Фикирлеринизи языныз