Эвельки байрамларымызны кениш къайд этейик
30 Апр 2008 | Дигер
Эвельде баба-деделеримиз девиринде отькерильген мусульман ве миллий байрамларымызны кениш къайд этмек керекмиз. Кельмешеклерден аятымызгъа кирип кельген байрамлардан исе вазгечмелимиз. Байрамларда арам олгъан ракъы-шарап ичимликлерни де ясакъ этмек керек.
Ислям дининде мубарек олгъан эки байрамымыз — Ораза ве Къурбан байрамларыны халкъымыз даа да тантаналы суретте къайд этмели. Байрам намазларына бармалы, Учь айларны къаршыламалы, Мирадж, Берат, Мевлюд ге-джелерини дуа-ибадетнен кечирмели. Рамазан айында кутьлевий суретте ораза тутмалы. Алла Таалягъа ялварып дуа окъумалы. Раббимиз бар экен, бизни къаранлыкътан ярыкъкъа чыкъарыр.
1917 сенеси инкъиляптан сонъ, советлер мемлекетинде яшагъан бутюн мусульманлар эзиет астында яшадылар, халкъымызнынъ башына исе бинъ бир тюрлю белялар кетирильди. Баба-деделеримиз кечире тургъан урф-адетлеримиз, байрамларымыз ясакъ этильди. Муфтимиз Номан Челебиджихан ольдюрильди. Имамларымыз, моллаларымыз къоранталарынен берабер Уралгъа сюргюн олундылар. 1944 сенесинден сонъ бутюн миллетимиз нидже-нидже хорлукълар чекти, ватандашларымыз ачлыкътан, хасталыкълардан бу дюньяны терк эттилер. Алланынъ рахметинде олсунлар.
Амма дюнья эр вакъыт денъише, эбедий бир шей яшамай, Алланынъ буюргъаны ола. Советлер укюмети халкъымызны не къадар ёкъ этип тырышса да, биз бугуньде, Аллагъа шукюрлер олсун, ана ватан топрагъымызгъа къайттыкъ ве динимизни, адетлеримизни гъайрыдан тиклеп кутьмектемиз.
Наврез, Хыдырлез байрамларымызны да гъайрыдан тиклемели. Джемаат бу байрамларгъа миллий урбаларны кийип барса, яхшы олур эди. Меселя, къызлар узун антерлер, феслер, фырланталар, эр кишилер исе миллий къалпакълар, къушакъларнен. Эр кес тек ана тилинде лаф этмели, миллий авалар янъгъырамалы. Бакъынъыз, не къадар гузеллик олур эди!
Эбет бу байрамларымыз къайд этиле. Концертлер кечириле, санаткярларымыз миллий аваларны, оюнларны иджра этип, ватандашларымызны къувандыралар. Лякин байрамларнынъ севиесини даа да котермели. Бу иш озюмизге багълыдыр.
Меселя, къызларымыз къыскъа антерлерни киймемели. Кимсе кельмешеклернинъ адетлерини кутьмесин!
Майыс башында Хыдырлез байрамы къайд этиледжек. Оны эвельки адетлеримизге коре кечирмеге арекет этейик. Бутюн ватандашларымызгъа келеяткъан Хыдырлез байрамы хайырлы олсун!
Юсуф АБЛАЕВ,
Янъы Джанкой коюнинъ имамы.
Фикирлер
Фикирлеринизи языныз