Акъмесджиттеки Петров балкасы микрорайонында яшагъан ватандашларымыз ибадетлерни япмакъ ичюн джамиге мухтаджлар. Акъмесджиттеки Кебир джами микрорайонымыздан еди км узакъта ерлешкен, анда бармакъ транспорт джеэтинден де къолайсыз. Бу себептен Петров балкасынынъ “Сабур” дин джемиети Нестеров сокъагъында джами къурмакъ акъкъында къарар чыкъарды.
Та 2004 сенеси джемиет джами ичюн ер айырмакъ риджасынен Акъмесджит шеэр шурасына мураджаат эткен эди. Бутюн керекли весикъаларны шурагъа теслим этти. 2004 сенеси 19-июльде язылгъан 11-нджи протоколгъа бинаен, Техника Шурасы ве Акъмесджит шеэр шурасынынъ Къуруджылыкъ, табиаттан догъру файдаланув, экология ве топракъ мунасебетлери боюнджа Даимий комиссиясынынъ бирликтеки топлашувында “согласовано депутатской комиссией для оформления в установленном порядке”, деген къарар чыкъарылгъан эди.
План шурасы бельгиленген ерде джами къуруджылыгъынынъ техникий имкянларыны тасдикълады.
Лякин 2005 сенеси 23-декабрьде Акъмесджит шеэр шурасынынъ 35-нджи сессиясы 499 санлы “Об отказе в согласовании месторасположения объекта строительства” деген къарарны къабул этти. “Сабур” дин джемиети къарарны анълатмакъны сорады. Шеэр къуруджылыгъы ве мимарлыкъ идареси о топракъ участкасы завод къурмакъ ичюн НИТИМФ ишханесине айырылгъан, деген джевап кельди.
“Сабур” дин джемиетимиз о весикъанынъ экинджи нусхасыны сорады, амма Акъмесджит шеэр шурасы бу весикъа сакъланмады, деп джевап берди. Бойлеликнен, “Сабур” дин джемиети Акъмесджит шеэр шурасынынъ джамиге ер айырмасында ред этмек акъкъында 499 санлы къарарыны къанунсыз ве оны лягъу этмек керек, деп сая.
Дин джемиетимиз джамиге ер айырмакъ риджасынен даа чокъ керелер Акъмесджит шеэр шурасына, аит идареге мураджаат этти. Амма бу меселе, чешит маниалар кетирилип, созула бере. Къырым везирлер шурасынынъ Дин ишлери боюнджа Комитети “Сабур” дин джемиетине къолтутаракъ, Акъмесджит шеэр башы Г.Бабенкогъа мектюп ёллады. Къырым мусульманлары Диний идареси де Акъмесджит шеэр шурасына мураджаатта булунып, “Сабур” джемиетине джами ичюн топракъ айырылмасыны сорады.
Амма языкъ ки, Акъмесджит шеэр шурасы Петров балкасында джами ичюн ер айырмакъ меселесини чезмей.
Камиль АМЕТ,
“Сабур” дин джемиети
шурасынынъ реиси.
Фикирлер
Фикирлеринизи языныз