13-ноябрьде Акъмесджитте Миллий Меджлис реисининъ биринджи муавини Рефат Чубар Украинада Полония Джумхуриетининъ Февкъульаде ве Векялетли эльчиси Яцек Ключковский иле корюшти.
Полония дипломатынынъ айткъанына коре, о Къырымгъа япкъан ресмий зияретининъ макъсады Полония ве Къырым арасындаки ишбирликнинъ илеридеки инкишаф эттирильмеси олды. «Ондан гъайры, зиярет черчивесинде биз Къырымда Полония Джумхуриетининъ баш консуллыгъы ачылмасы меселесини огренемиз», - деп къайд этти Ключковский.
Корюшюв девамында Къырымда юзь берген ичтимаий-сиясий ве, хусусан, къырымтатар халкъынынъ вазиети музакере этильди.
Яцек Ключковскийнинъ мура-джааты иле Рефат Чубар Къырымда топракъ меселесининъ чезильмек хусусиетлерине къыймет кести. Бу саада, деди Рефат Чубар, ерли акимиет «дигер ерде къулланмагъа ляйыкъ олгъан инатлыкъ иле топракъ алгъан юридик шахслар ве миллетине эм де ичтимаий дурумына бакъмадан гражданларнынъ екяне реестрини тертип этмек ве оны беян этмектен сакъыналар».
Бойлеликнен, Р.Чубарнынъ фикирине коре, акимиет ялынъыз репатриантларгъа кельгенде, ишлетильген статистиканы огге сюрип, къырым топракъларынынъ такъсимленювини акс эттирген акъикъий вазиетнинъ айдынлатылмасына махсус кедер этелер.
Корюшюв черчивесинде онынъ иштиракчилери Полониядаки девлетнинъки олмагъан тешкилятлар ве къырымтатар джемаат тешкилятлары арасындаки, шу джумледен, маариф, ерли озь-озюни идаре этюв органлары ве иш тешеббюсчилиги саасындаки ишбирликни фааллештирмек имкянларыны огрендилер.
«Бугуньде 15-ке якъын къырымтатар яшы Полония алий окъув юртларында тасиль алды, - девам этти Р.Чубар, - оларнынъ чокъсу шимди де илимнен ограша, ильмий диссертацияларны къорчалайлар, оджа вазифесинде чалыша ве БМТ къурумында мешгъуллер».
Украина, Полония ве Къырымнынъ сыкъы тарихий аля-къасыны козьде тутаракъ, о 17-18 асырларда Полония, Украина ве Къырым арасында олгъан мунасебетлерни терендже огренмек ичюн къырымтатар, украин ве полония яш алимлеринден иджадий группалар тизмек тешеббюсинен чыкъты.
Меджлиснинъ матбуат хызметинден.
Фикирлер
Фикирлеринизи языныз