Биз умютнен яшаймыз ве окъуйыджыларымызнынъ сайысы эксильмейджегине инанамыз
19 Ноября 2008 | Тильге итибар - ильге итибар
Абуне - 2009
Бу куньлерде бутюн газетлер сырасында бизим «Къырым» газетине де абуне олув къызгъынлыкънен девам эте. Халкъымызнынъ тарихы, медениети, санаты, адетлери, топонимиясы, тили ве дини акъ-къында меракълы макъалелер эр вакъытта олгъаны киби, янъы, 2009 сенеси де мунтазам суретте дердж этиледжек.
Муарриетимиз энди чокътан берли арзу этип кельген ниетини эмирге кечирмек, яни афтада учь кере газет чыкъармакъ ичюн эки ай эвельси Украина Везирлер Шурасынынъ аит комитетине мектюп ёллады. Лякин, кесен-кес бир мусбет джевап олмагъаны себебинден биз де сизге ачыкъ-айдын бир сёз айтмагъа сакъынамыз. Чюнки бу девлетнинъ, бу укюметнинъ ёлбашчыларындан халкъымыз менфаатына япаджакъ эйи ишлерни беклемек - огюз тюбюнден бузав беклемек киби бир шейдир.
Эр алда, бельки меселемиз чезилир, янъы йылдан башлап афтада учь керелик газет чыкъарырмыз деп, умют этемиз.
Неширимизнинъ 2009 сенесине абуне фиятлары бойледир:
Бир айлыгъы 4 грн., учь айлыгъы 12,
алты айлыгъы 24, бир йыллыгъы исе 48 гривня.
Газетимизни энди йыллар девамында алып, онынъ эксикликлери ве енъишлерини яхшы бильген, бизимнен фикир болюшкен, дертлешкен, къувангъан ве акъыл танышкъан садыкъ окъуйыджыларымыз, бир шейге бакъмадан, бизден айырылмаз, фааль окъуйыджымыз оларакъ къалыр деген фикирдемиз.
Газетимизнинъ индекси 61059.
Фикирлер
Фикирлеринизи языныз