“Омюр ичюн сизге миннетдармыз!”
27 Дек 2008 | Миллий тарих
Мукяфатлав мерасими
Бу сёзлер “Хесед Шимон” еудийлернинъ меркезинде шиарда язылып диваргъа асылгъан. Айны шу сёзлер еудий халкъынынъ къаиде сёзлери олгъан. Алман фашистлери укюм сюрген девиринде озь джаныны аджымайып еудийлерни къуртаргъан инсанларгъа бойле сёзлернен миннетдарлы-гъыны бильдиргенлер.
Мында ерлешкен фонднынъ ады “Фашистлер тарафындан ольдюрильгенлернинъ хатырасы”. Бу фонднынъ эсас макъсады II джиан дженки вакътында еудийлерни олюмден къуртаргъан адамларны ве оларнынъ аиле азаларыны тапып ярдым этмектир. Бойле инсанларны “Праведник Украины”, “Праведник мира” деген ярлыкъларнен мукяфатлайлар.
23-декабрьде еудийлернинъ Йыл башы себебинден бу фонднынъ саиплери ярлыкъларнен мукяфатлангъан ве мукяфатланаджакъ инсанларны топладылар. Къавалтыларнен донатылгъан маса башына мусафирлер отурдылар. Фонднынъ башы мерасимни ачып, топлан-гъанларны янъы йылнен хайырлады ве фонднынъ алып баргъан ярдым арекетлери акъкъында къыскъа малюмат берди.
О бутюн джемааткъа еудий халкъынынъ адындан миннетдарлыкъ бильдирип бойле деди: “Еудий халкъы сизинъ джесюрлигинъизни ич бир вакъыт акъылындан чыкъармаз ве сизинъ адлары-нъызны несиллерге инсанперверлик орьнеги оларакъ бильдиреджек”.
Сонъра Президент В.Ющенко бойле инсанларны III дереджели орденинен мукяфатлав акъкъында имзалагъан ферманыны окъуды ве сёзни Президентнинъ Къырымдаки векилининъ муавинине берди. О мукяфатлангъан инсанларны хайырлап, тантаналы суретте орденлер такъдим этти.
Мукяфат алгъан он бир инсан арасында учю къырымтатардыр. Булар Алиме Бекирова, Зелиха Ибрагимова ве Ильми Ильясов.
Ильми Ильясов мукяфатлангъанлар адындан чыкъышта булунаракъ, бойле деди:
-”Дюльберлик дюньяны къуртарыр”, деген айтым бар. Лякин мен оны бираз денъиштирип айтмагъа истейим: “Япылгъан яхшылыкълар дюньяны мытлакъа къаза-белядан къуртарыр”. Чюнки яхшылыкънен япылгъан ишлер миллетлер, динлер арасында достлукъ, севги, анълашма яратыр. Адамлар арасында толерантлыкъ, бири-бирине урьмет, севги пейда олур, олар бири-бирине къол узатырлар, ярдым косьтерирлер. Яманлыкъ, бири-бирини акъаретлев исе миллетлер арасында тек душманлыкъкъа алып келир. Бойле алларгъа ёл бермемек керек.
“Яхшылыкъ яп да, денъизге ат”, деген аталар сёзю бар. Алла онынъ къаршылыгъыны илле къайтарыр. Бунъа эсасланып анам, бабам бойле насиат бергенлер: “Сен эким олдынъ, онынъ ичюн адамларгъа тек яхшылыкъ, элинъден кельген ярдымны яп”. Мен омюримде бу насиатны беджермеге тырыштым.
Иште, мерасим тантаналы суретте, яхшы севиеде кечти. Тебриклер биткен сонъ, П.Чайковский адына музыка мектебининъ талебелери концерт косьтердилер.
Дильшад ИЛЬЯС,
Акъмесджит ш.
Фикирлер
Фикирлеринизи языныз