Окъуйыджылар иджадындан
Адалет енъер
Къыркъ дёртнинъ баарь куньлери
Ич чыкъмайджакъ акълымыздан.
Къырымларны сюргюн эттилер
Озь дюльбер Ватанындан.
Бу фелякет санки йылдырым
Гъарип халкъымызны сечти.
Окюр-окюр агълады халкъым,
Таш-топракълар инъледи.
Къара тренлер эп кетелер:
Сибирь, Урал, Асиягъа…
Къаабатсыз халкъны ольдюрелер,
Джинает сыгъмай акъылгъа.
Буны инсан заты япмаз,
Къайтсын беля сизлерге.
Омюр бою мен къаргъарым:
Лянет олсун сизлерге.
Эр шейнинъ бар, эльбет, сонъу,
Бу гуняхлар сизге онъмаз.
Бизге япылгъан хиянетликни
Миллет омюр бою унутмаз.
Буны корьди бутюн алем
Халкъларгъа орьнек олды.
Ахыр-сонъу вахший девлетнинъ
Бакъынъыз сонъу не олды.
Бугунь бизни кене ашалайлар
Сайымыз ашагъа кете.
Къырымларны гизли ольдюрелер,
Джинаетлер девам эте.
О джинаетлер бир куню битер,
Зулум озь башына етер.
Халкънынъ сабыры битер,
Адалет бир кунь енъер.
Энвер АЙВАЗОВ.
Чеккен азапларым
Намлысынъ, намлы Озьбекистан
Озь халкъынъа юрт эм гулистан…
Биз ичюн олдынъ къабристан,
Битмез асла язсам да дестан.
Союм-сопум къалды тарланъда,
Етим къалдым балалыгъымда.
Бильмейим къабирлери не ерде?
Бир къышлакъта ольгенлери эсимде…
Етимликте чеккен азапларым -
Бир тюрлю ольчюнен ольченмез.
Бир омюр чеккен аизарым -
Мезаргъа киргендже тюкенмез.
Он экиде эди о заман яшым,
Вефат этти агъам, къардашым…
Мусибетке огърагъан сонъ башым,
Кульгенде биле акъты козь яшым.
Маммет БЕШИКЧИ.
Бирлешинъиз, йигитлер!
(поэмадан бир парча)
«Авдарыл къая, бас мени,
Корьмесин козюм.
Ольсем, озюм олейим,
Ольмесин сёзюм».
Бинъ докъуз юз къыркъ дёрт сене,
Он секиз майыс куню, -
Ана-баба, машер куню, -
Эсиме тюшти кене.
Нидже хорлукълар чектим,
Нидже зорлукълар корьдим,
Ана-бабасыз, етим
Ач-зелиль омюр сюрдим.
Яшым авды етмишни,
Махв олды ана-бабам.
Мушкюлятлы кечмишни
Омюр билля унутмам.
Насыл этип унутырсынъ,
Дешетли эди заман,
Чекишкен четте турсун,
Тутып алынды Ватан.
Марум къалдыкъ Къырымдан -
Джандан татлы Ватандан.
Унутмагъа акъкъым ёкъ,
Осеяткъан несиль бильсин,
Бахтлы олып, къарны токъ,
Козьяшларын кулип сильсин…
Биз корьгенин - корьмесин!
Оксюз къалып юрмесин!
Бинъ яшасын, бинъ онъсын!
Къазалардан-белялардан,
Корюльмеген афатлардан
Алла Тааля къорусын!
Нелер корьдик, нелер чектик
Сюргюнликте биз, къартлар.
О заман бала эдик,
Буны ким, аджеп, анълар?..
Ана-юртсыз аят бармы,
Истер дженнетте яша;
Саба-акъшам этли-ягълы
Истер къавурма аша…
Тек Ватанда, мекянынъда
Бахтлы ола билесинъ.
Гедже-куньдюз, атта танъда
Зевкъ-сефасын сюрерсинъ.
Мында факъат сен саипсинъ,
Кельмешеклер - мусафир.
Бугунь, билем, сен гъарипсинъ,
Ярын алынъ денъишир.
Бирлик олсакъ - енъермиз,
Ириширмиз макъсаткъа.
Миллет дие, эгер биз
Гъайрет этсек эр дакъкъа.
Куреш мейданы ачыкъ,
Йигит олсанъ, къана, чыкъ!
Ватан огърунда куреш,
Къырым огълу, семетдеш.
Бу ер - меним Ватаным,
Меним тувгъан топрагъым.
Тёкюльди меним къаным,
Джеллят элинде джаным.
Севимли азиз Ватан,
Сенинъ ичюн джан къурбан!
Дагълар-ташлар, къаялар -
Эписи Ватан булар.
Ах, дагъларым, дагъларым,
Сизнен умют багъларым;
Асрет чекип узакъларда
Окюр-окюр агъларым.
Кобек къаным тёкюльген
Къулан чёллерим меним.
Манъа теселли берген
Ана топрагъым, ерим.
Мында эвель-эзельден
Яшагъан баба-дедем.
Эдждатларым огюнде
Теменна, седжде этем.
Олар лакъырды эткен
Татлы тильнен къонушам.
Намаз къылам саба эрте,
Уйле вакъыт ве акъшам.
Янъгъырасын ана тилим
Мектеплерде,сокъакъта.
Еди къат кокке етсин,
Эшитильсин эр якъта!
Ана тилим - анамдан,
Ана тилим - бабамдан.
Халкъымдан, топрагъмдан,
Дагъымдан , чокърагъымдан.
Ана тилим - къанымда,
Ана тилим - джанымда,
Ана тилим - мийимде,
Ана тилим - тилимде!
Ана тильнен лаф этерим,
Ана тильнен тюркюлерим,
Эм агъларым, эм кулерим,
Дестанымны эйбетлерим,
Ана тильни биз джойсакъ,
Миллетимиз ич онъмаз.
Алемде халкъ оларакъ
Тюсюмиз биле къалмаз.
Тувгъан тильни унутманъыз,
Дуа киби текрарланъыз!
Къувандырманъ душманны -
Къачырманъыз Ватанны!
Сизге аит огютлер -
Къабул этинъ, йигитлер!
Эдем КУНЕШЛИ,
Акъмесджит ш.
Биз къайттыкъ санъа, азиз Ватан!»
Алтмыш бешни толдураджакъ бу йыл сюргюн,
Он секиз майыс - миллий матем куню.
Олгъан джинает сёзнен ифаделенмез,
Асырлар кечер, о хатырадан кетмез,
Къыркъ дёртюнджи - Ватандан айырылув.
Къыркъ дёртюнджи - бу фелякет, олюм, къайгъы,
Къыркъ дёртюнджи - элли йыллыкъ сюргюнлик,
Къыркъ дёртюнджи - халкъымызнынъ матем куню.
Дешетли сюргюнлик балалыгъымны хырсызлады.
Яшлыгъымнынъ гузеллигин сильди,
Гъурбеликте ана-бабам вакъытсыз ольди,
Къабирлери узакъ ябанлыкъта къалды.
Азизлерим, багъышланъыз мени.
Ят тарафта къалдырдым сизлерни.
Мезарлыкъны зиярет япамам,
Яткъан еринъизде дуа окъуялмам,
Озьбекистан сыджагъына даяналмадынъ,
Къырымнынъ бир ютум сувуна мухтадж олдынъ,
Сербест эскен еллерини къыдырдынъ,
Ах, тельмирип, ах, тапалмай дюньядан кечиндинъ.
Гъурбетликте козь юмгъанлар
Алла рахметинде олсун.
Къаранлыкъ тар мекянларны
Къураннынъ нуру ярыкълатсын.
Омюр отти, кечти йыллар
Гъамлы башкъа тюшти чаллар,
Лякин эр бир нефесимде,
Турасыз меним эсимде
Нелер чектим, нелер корьдим,
Азиз Ватан сенсиз элли йыл яшадым,
Яш омюрни къыйналып кечирдим.
Анджа санъа къавушмагъа умюдимни узьмедим.
Йыллар отти - артты санъа севгим.
Алтмыш еди - алтмыш докъуз йылларында
Имкян догъды Ватангъа къайтмагъа.
Халкъ арекети ёл алды,
Джерьян олып ильк адым ташланды.
Москва. Къызыл мейданда шиарлар:
«Верните на Родину крымских татар!»
Зорбалыкънен КГБджи миллетни къабаатлай,
Излеринден тюшип, апсханеге къапай.
Мушкюль йылларыны кечтинъ ярып,
Махкемелерден къоркъмадынъ!
Залымларгъа башынъны эгмейип,
Авдет ёлунъ джесаретнен ачтынъ!
Мен къайттым санъа, гузель Ватан,
Санъа седжде этем, инан.
Билем, сен беклединъ мени,
Санъа бахшыш этем юрек атешимни.
Гъурбетликте къалды кучь-къуветим,
Эсли олып къайттым, ана-Юртум.
Сенинъ огюнъде борджум беджердим:
Урф-адетни, ана тилимни джоймадым.
Ишанчынъны мен эда эттим,
Ярым асыр санъа севгимни сакъладым,
Онынъ чыракътай ярыкъ атешин
Йыллар бою сёндюрмей кетирдим.
Азиз Къырымгъа къавуштыкъ, оны гуллетейик.
Ана-Юртумызнынъ эр бир кошесинде
багълар осьтюрейик,
Миллетимизнинъ къувети - онынъ бирлигинде,
Ярдым къолу догъмуш еримизде
Ачыкъ гонъюльнен узатайыкъ,
Буллюр сувдай темиз тилимизни юксек
минберге чыкъарайыкъ,
Акъ-укъукъны къануний къорчалайыкъ.
Зинданларгъа батсын залым девир.
Ана топракъ, миллет, инан, кучюнъни берир,
Бахтлы куньлер, шубесиз, келир!
Агъа-къардашмыз бир-биримизге
Къан, дин, тиль, урф-адетлерде,
Бизим силямыз - бирлигимизде.
Турмуш, эмекте, юртны севмекте
Рухунъны къуветле, къырымлым деп, гъурурлан.
Ватанынъны, тувгъан тилинъ севгенинънен
Ишкир, эмексевер эллеринънен,
Эм де иззет сайгъы бильгенинънен.
Йымшакъ икълим сакълансын Къырымда.
Мавы кокте булут топланмасын,
Эки ренкли байракънынъ янында
Тамгъалы кок байракъ ельпиресин!
Джеваир ИПЧИ.
Саифени Э. ОЗЕНБАШЛЫ азырлады.
Фикирлер
Фикирлеринизи языныз