Датсыз аштан депрессия ола биле
28 Янв 2009 | Дигер
Сувукълар кельгенинен чокъ адамлар алсызлыкъ сезе, кейфлери бозула. Базы ашайт махсулатларындан депрессия ола биле. Бойле ашлар чокъ дегиль. Бу къаве, шекер, шекер ерини туткъан махсулатлар (сахарозаменители). Эм де буюк микъдарда къырмызы эт.
Алимлер бильдирелер: куньде 3-4 кере ве ондан зияде къаве ичкен адамлар депрессиягъа огърайлар. Бу ал кофеин мухтаджлыгъына (зависимость) сыкъы багълы. Эгер къаве севген инсан эр куньлюк допинг - къаведен марум этильсе, о озюни ярамай, бахтсыз сезер. Бу себептен экимлер куньде 1-2 кере къаве ичмеге ве ичюв арасында тенефюс япмагъа теклиф этелер.
Чокъ адамлар ярамай кейфлерини котермек ичюн татлы шейлерни ашайлар. Лякин тиббият теткъикъатлары косьтергенине коре, ашнынъ ичинде шекер чокъ олса, инсан депрессиясы ве болдурувы зияде ола. Инсан татлы ашларгъа алыша. Вуджут шекер утилизациясы япмакъ ичюн чокъ инсулин ишлеп чыкъармагъа алыша.
Инсан невбеттеки татлы дозасыны ашамаса да, кейфи бозула. Базы ашайт къошмаларындан (пищевые добавки) депрессия ола биле. Меселя, аспаркам иле махсулатларны ашагъан инсанлар депрессиягъа зияде огърайлар.
Эгер инсан сыкъ-сыкъ, чокъ микъдарда мал, къой этини ашаса, эт кереги киби менимсенильмей. Къалын ичекте бозулув джерьяны башлана (разложение). Нетиджеде зеэр пейда ола. Бу зеэр къангъа тюшип, бутюн вуджуткъа зарар кетире. Биринджиден синъирлер системине ярамай тесир ола. Адам синъирли ола, тез болдура ве ярамай юкълай. Джигери хаста олгъан инсанларгъа чокъ эт ашамагъа пек хавфлыдыр. Чюнки джигер зеэрнинъ зарарыны ёкъ эте.
Эгер инсан осюмлик ягъларыны ве ягълы денъиз балыгъыны керекли микъдарда ашамаса, депрессиягъа огърай биле. Ягълар (жиры) синъирлер системи ичюн къуруджылыкъ материалы оларакъ ве яхшы кейф ичюн пек кереклер. Бу себептен ягъларны керекли микъдарда ашамагъан инсанлар омюр къуветини джоялар. Магний, фолий экшилиги, В6 витамини етишмегени мийде серотонин етишмемезлигине кетире. Серотонин - яхшы кейф олмакъ ичюн керекли мадде. Умумен ешиллик ашамагъан ве себзе, мейваларны аз ашагъан адамларгъа бу витаминлер етишмей.
Азмагъа истеген инсанлар да депрессия хасталы-гъына огърай билелер. Психологларнынъ фикирине коре, датсыз ве чешит олмагъан аш вуджутта эмоция дуйгъулар вазиетини феналаштыра, кейф яхшы олмай, инсан озюни болдургъан киби сезе. Меню, яни ашы-нъыз сиз бегенген махсулатлардан олмасы муимдир. Эгер сиз къара богъдай (гречка), джылап курьпелерини (овсянка) бегенмесенъиз, бу боткъаларны ашап диета тутмагъа керекмей. Сиз севмеген, бегенмеген ашайт махсулаты сизге психологик зарар япа биле ве атта синъир бозулувына (нервное расстройство) кетире биле. Хусусан кузьде, къышта диета депрессиясы ола биле. Бу себептен диеталарны бу мевсимлерде тутмакъ тевсие этильмей.
Я ашайт махсулатлары вастасы иле депрессиянен насыл курешмек мумкюн? Диетологлар пенир, мысыр ве тавукъ этини, макарон, ве отьмек (грубого помола) ашамакъны тевсие этелер. Бу махсулатларда къуванч гормонларыны яраткъан мадделер бар.
Психологлар айткъанына коре, депрессиянен къызыл, портакъал ве сары тюслер вастасынен курешмек мумкюн. Сизинъ масанъызда портакъал, мандарин, къуш къонмаз (облепиха), хавуч, къабакъ, татлы бибер ве мысырбогъдай олмалы. Бу махсулатларда калория чокъ олмагъаны себебинден семирерим, деп къоркъмагъа керекмей. Магний ве витамин В6 олгъан махсулатларны чокъ ашанъыз. Булар: банан, джевиз, япракълы ешиллик, магний олгъан сув. Бу махсулатлар юкъуны нормаллештире ве юксек эеджанланувны эксильте. Эгер сиз пек тюшюнджели олсанъыз, кейфинъиз бозулса, кучюк пирожное я да шоколад ашанъыз.
Азырлагъан С.АБДУРАХМАНОВА.
Фикирлер
Фикирлеринизи языныз